Silvaplana

Infos

Exposiziun publica dal project da vias

Exposiziun publica dal project da vias
H3b Via dal Malögia
Punt Ova dal Vallun km 0,57 – km 0,57
Project d'exposiziun nr. 3b.5112 da l'avrigl 2020

1. Lieu e durada da l'exposiziun
Las actas dal project èn exponidas dals 20 da fanadur 2020 fin ils 19 d'avust 2020 tar l'administraziun communala da Silvaplauna, Via Maistra 24, 7513 Silvaplana, per prender invista (art. 20 da la Lescha chantunala davart las vias, LVias; DG 807.100), s'annunziond ordavant per telefon (081 838 70 70). Durant il temp d'exposiziun pon ils documents er vegnir consultads e chargiads giu sut www.tiefbauamt.gr.ch > Rumantsch > Actualitads. La nova axa da la via (mellen) è stajada respectivamain marcada en la cuntrada.

2. Dumondas per permissiuns spezialas
Las suandantas dumondas èn parts dal project d'exposiziun:
- dumonda da permissiun per inducir u per laschar sfundrar aua persa smerdada tractada tenor l'art. 7 al. 1 da la lescha federala davart la protecziun da las auas;
- dumonda da permissiun per inducir aua persa betg smerdada en in'aua da surfatscha tenor l'art. 7 al. 2 da la lescha federala davart la protecziun da las auas;
- dumonda da permissiun per projects da construcziun en secturs spezialmain periclitads tenor l'art. 19 al. 2 da la lescha federala davart la protecziun da las auas;
- dumonda da permissiun per facilitaziuns per stabiliments existents tenor l'art. 17 da la lescha federala davart la protecziun da l'ambient
- dumonda da permissiun per cuvrir u per metter en bischens auas currentas tenor l'art. 38 al. 2 da la lescha federala davart la protecziun da las auas;
- dumonda da permissiun tenor la legislaziun da pestga per far intervenziuns tecnicas en las auas tenor l'art. 8 al. 1 da la lescha federala davart la pestga;
- dumonda da permissiun per la correcziun dals curs d'aua tenor l'art. 22 al. 1 da la lescha chantunala davart la correcziun dals curs d'aua.

3. Restricziun dal dretg da disponer
A partir dal di che l'exposiziun è vegnida publitgada uffizialmain dovran ils projects da construcziun entaifer il territori ch'è cumpiglià dal project ina permissiun dal Departament d'infrastructura, energia e mobilitad dal Grischun. Questa permissiun vegn concedida, sch'il project da construcziun n'ha naginas consequenzas engrevgiantas per acquistar il terren u per realisar il project.

4. Protesta
4.1 Legitimaziun
Tgi ch'è pertutgà dal project d'exposiziun e po far valair in interess degn da vegnir protegì per abolir u per midar quel, ha il dretg da far protesta. Il dretg da far protesta han plinavant las vischnancas pertutgadas e tgi ch'è autorisà tras il dretg federal da far quai.
4.2 Objecziuns
I pon vegnir fatgas valair:
a) objecziuns cunter il project d'exposiziun e cunter las dumondas per ulteriuras permissiuns ch'èn colliadas cun quel sco er cunter in'expropriaziun previsa e cunter sia dimensiun;
b) dumondas d'indemnisaziun, en spezial pretensiuns per ils dretgs che vegnan fatgs valair e per autras pretensiuns che resultan dal dretg chantunal d'expropriaziun. La rectificaziun da questas dumondas ha lieu suenter l'approvaziun dal project en la procedura per l'acquist da terren.
4.3 Termin ed adressat
Protestas ston vegnir inoltradas entaifer il temp d'exposiziun cun ina curta motivaziun al Departament d'infrastructura, energia e mobilitad dal Grischun, Stadtgartenweg 11, 7000 Cuira.
Sche pretensiuns d'indemnisaziun vegnan fatgas valair posteriuramain, ston vegnir observadas las consequenzas da la negligientscha tenor l'art. 17 da l'Ordinaziun chantunala d'expropriaziun (OExp; DG 803.110).

Departament d'infrastructura, energia e mobilitad dal Grischun
Il schef:
dr. Mario Cavigelli, cusseglier guvernativ

Publikation online: 22.07.2020  – PDF-Download


Gemeinden