Zuoz

Infos

Gemeindebericht - Zuoz

Zeitraum: Avuost 2019

In occasiun da sias tschantedas düraunt il mais d’avuost 2019 ho il cussagl cumünel da Zuoz traunter oter decis il seguaint:

Fabricas / Il cussagl cumünel ho relascho ils seguaints permiss da fabrica: Repower, Bever: sanaziun iglüminaziun publica in connex cul s-chev aviert sülla Via Dimvih d’Aguêl. Martin Dünki e Claudia Bretschger Dünki, Stäfa: per üna nouva lucarna da tet, Chesa Davous Crasta B.

Bains immobigliers cumünels / Discussiun futur agir plazza da scoula: Il cussagl piglia cugnuschentscha da las differentas chartas ed intimaziuns a buocha da tuottüna lascher la plazza da scoula scu ch’ella es, voul dir cul üert immez e scha pussibel eir sainza saiv. Our da la discussiun resulta il seguaint:

Our da motivs da sgürezza es da monter ils prüms elemaints da la saiv da fier davent da la lattaria veglia vers Plaz. Il rest da l’ur da la plazza da scoula dess gnir sgüro cun bügls e baunchs, almain fin cha vain l’inviern e que scu temp da prouva. Il cussagl discuta la proposta da s-chaffir üna zona d’inscunter inua cha’l pedun ho adüna priorited invers ils autos, chi paun circuler be cun max. 20 km/h. Eir quist dess gnir introdüt scu fasa da test per ramasser experienzas. A reguard l’üert da la Lia Rumantscha decida il cussagl cha quel dess rester almain fin la mited settember e scha pussibel fin tar las vacanzas d’utuon. A reguard il futur da la plazza da scoula e Plaz propuona il president d’integrer ün import per la planisaziun d’ün proget aint il preventiv 2020. Scu lezcha dess il cussagl fer ponderaziuns scu cha’s voul imbellir ed optimer la situaziun existenta, ün böt chi’d es eir formulo illa strategia Zuoz 2025. Il cussagl es perinclet cullas imsüras e cul agir.

Commerzi e misteraunza, turissem / Rendaquint SSZ AG an da gestiun 2018-2019: Luis A. Wieser, in sia funcziun scu president dal cussagl administrativ, preschainta e declera il rendaquint da la SSZ AG per l’an da gestiun 2018/2019.

Las egnas entredgias s’haun sbassedas per 16 pertschient, las entredgias our dal Pool però sun augmantedas per 18 pertschient. Duos terzs da las entredgias vegnan dal Pool e be ün terz sun egnas, que chi demuossa la dependenza dal Pool regiunel. Las frequenzas sun praticamaing glistessas scu l’an aunz. Il resultat negativ ho in prüma lingia da chefer culs cuosts da persunel pü ots ed entredgias da terz pü bassas (WM2017). Que chi chargia il rendaquint sun las amortisaziuns, impustüt quellas per la s-chabellera Albanas e per l’implaunt d’innaivaziun.

Cunvegnas da prestaziun cun ESTM AG: Il president preschainta duos cunvegnas da prestaziun culla ESTM AG chi reglan l’andamaint dal post d’infurmaziun in staziun. La düreda vain definida pels ans 2020 e 2021, per surmunter la fasa d’elavuraziun d’ün nouv concept «Infostellen 2020». La plazza per la Posta vain nouv doteda cun ün pensum da 50 pertschient. Las provisiuns da la Retica e da la Posta nu zuoglian ils cuosts, ma il cussagl es da l’avis cha’l servezzan public suos-cha custair qualchosa, scha la spüerta es buna. Ulteriurs detagls sun formulos illas cunvegnas da prestaziun. A maun da quistas ponderaziuns decida il cussagl d’accepter las nouvas cunvegnas da prestaziun e da suottascriver telas.

Organisaziun da vschinauncha / Infurmaziuns our da tschantedas da cumischiuns: Via Vaüglia: il president orientescha cha la Via Vaüglia (Sur e Suot) as rechatta in ün nosch stedi zieva ils dans da prümavaira e sted. Scha pussibel as vess da piglier per mauns la sanaziun, eir scha’l proget es previs pür düraunt ils ans 2021 e 2022. Tenor l’uffizi da god dess que però la pussibilited da lascher fer ün stüdi tres ün indschegner auncha quist an per invier las prümas imsüras la sted chi vain e da prefinanzier quellas da la vschinauncha a charg dal proget chi vain realiso dals ans 2021 e 2022.

Cumischiun da planisaziun: la cumischiun ho piglio cognit dal stüdi dal indschegner Burkart, chi ho verificho la nouva zona cotschna chi pertuocha la terrassa dal Restorant Purtum. El vain a la conclusiun cha la zona cotschna es güstificheda.

Inavaunt propuona la cumischiun da planisaziun da lascher elavurer üna carta da prievels d’ova per sclarir la situaziun in Suotarivas ed Islas. La vschinauncha as vess da parteciper cun desch pertschient vi da l’elavuraziun tres ün indschegner specialiso. Il cussagl es perinclet cul agir. (ps)


Gemeinden