Zuoz

Infos

Gemeindebericht - Zuoz

Zeitraum: Lügl fin settember 2022

In sias ultimas tschantedas ho il cussagl cumünel traunter oter tratto e decis sur dal seguaint:

Uorden da multas – adaptamaints a la ledscha chantunela

La vschinauncha da Zuoz ho il dovair dad adapter l’uorden cumünel da multas a la ledscha chantunela. L’adaptamaint principel es la numeraziun dals differents artichels, chi vain armoniseda in tuot il chantun per cha registraziuns digitelas sajan pussiblas. Dal cuntgnieu e dals imports resta tuot scu existent. L’unica excepziun per tuocha l’artichel 20.g.6 „Liegenlassen von Hundekot“. Il cussagl cumünel es da l’avis da lascher l’import sün CHF 200.00. Tuot ils oter adaptamaints vegnan appruvos e l’uorden scu tel delibero unanimamaing.

Gruppa da lavur Zuoz 2025 – Purtum/Plagnoula

Zieva cha la ditta EcoAlpin ho preschanto l’analisa da potenziel pels areals da Purtum e Plagnoula our da la vista scolastica e turistica, ho la gruppa da lavur in carica valüto la situaziun. La gruppa da lavur vezza seguainta proposta our da l’analisa scu quella da perseguiter: Il svilup da las scoulas dess capiter ill’infrastructura existenta tar Plaz ed impü in Plagnoula. La Chesa dals Pesters nu dess in futur pü esser ün edifizi scolastic, otras ütilisaziuns sun da discuter. Purtum dess gnir sviluppo cul focus turistic. Il pass da svilupper l’areal da Plagnoula chaschuna la ponderaziun dad ingrandir il Parkegi Centrel per mantgnair u dafatta augmanter la quantited da plazzas da parker. La gruppa da lavur Purtum/Plagnoula vain unanimamaing schoglieda e seguaintas nouvas gruppas da lavur vegnan zieva cuorta discussiun missas in vigur: Gruppa da lavur „Plagnoula“, Gruppa da lavur „Parkegi Centrel“, Gruppa da lavur „Purtum/Chesa dals Pesters“, Gruppa da lavur „Plaz – realisaziun“.

Parceller our vias champestras

Seguaintas vias champestras sül territori da la vschinauncha da Zuoz nu sun parcelledas oura e passan sur numerusas parcellas privatas:

Via da la Paschiun, traget da l’Ova da Val d‘Urezza fin sül cunfin culla vschinauncha da S-chanf.

In Vuorcha/Suotarivas, da la Via Vuorcha vers il stand da tir fin tar l’Ova dad Urezza.

In Champatsch da l’Ova da Quatterlains vers Madulain fin sül cunfin cun Madulain. Sü Muntatsch da Cuort San Gian fin tar l’Acla Puzzer, Acla Viroula ed Acla Muntatsch.

La vschinauncha ho l’interess da parceller our il territori da quistas vias e da surpiglier il possess per pudair agir a reguard il mantegnimaint. L’administraziun piglia a maun las lavuors da zavrer our tuot ils possessuors e da contacter quels cun ün offerta pel terrain.

Tscherna nouva giarsuna a partir dad avuost 2023

La cumischiun da persunel fo la proposta da tscherner üna nouva giarsuna per l’administraziun cumünela a partir dad avuost 2023. Entredas d’eiran duos candidaturas da persunas chi haun eir fat ün giarsunedi d’inseg ill’administraziun cumünela da Zuoz. Zieva avair valüto las candidaturas propuona la cumischiun da persunel da tscherner a duonna Annina Schöpf da Zernez scu nouva giarsuna. Il cussagl cumünel segua a la proposta, tscherna unanimamaing a Duonna Annina Schöpf e gratulescha cordielmaing per la tscherna.

Iglüminaziun da Nadel – preschantaziun proget

Ils depütos respunsabels preschaintan a maun da visualisaziuns üna proposta per la nouva iglüminaziun da Nadel. L’installaziun prevezza 3 archs tals vouts tar la Tuor, 3 installaziuns tar las entredas da vschinauncha (San Bastiaun, Manvais-ch e tar la baselgia catolica) e sün 17 candelabers in vschinauncha. Impü vain eir adatteda l’iglüminaziun dal bös-cha da Nadel sün Plaz. Tuot il proget es offert per cuosts da CHF 27‘000.00. In quist prüm pass gniss realiseda l’iglüminaziun pel minz da la vschinauncha. Pel futur es previs da realiser eir la Via da Staziun e l’entreda da vschinauncha in Vuorcha.

„Livestream“ radunanza cumünela

Tenor il president cumünel as po arcugnuoscher cha la spüerta dal „Livestream“ es steda professiunela e tres que eir predscheda. Las statisticas sur da l’ütilisaziun sün YouTube sun detagliedas e laschan dir il seguaint: La radunanza cumünela es gnida clameda sü in favrer totelmaing 319 voutas, in gün 221 ed in avuost 121 voutas. Dimena ho l’interess adüna piglio giò. Al listess mumaint sun stedas traunter 40 e 60 persunas in sela da gimnastica a las radunanzas cumünelas transmissas. Ponderand ils cuosts decida il cussagl cumünel da na cuntinuer culla spüerta dal „Livestream“.

Progettaziun fermativas da bus S-charlattina e Stradun

Siand cha la ledscha federela davart l’eleminaziun dals dischavantags invers persunas cun impedimaints pretenda dad adatter las fermativas da bus incumbenzescha la vschinauncha da Zuoz ün büro d’indschegner per la progettaziun da telas fermativas. Las fermativas a la Staziun vegnan planisedas in connex culla sanaziun da la Staziun. La realisaziun da las fermativas süsom la Via S-charlattina e tal Stradun in Chastlatsch es previsa dal 2023.

Ledscha taxa da giasts e promoziun turistica

La ledscha existenta a reguard la taxa da giasts e promoziun turistica es da l’an 2010 e dumanda zieva üna sur elavuraziun. In prüma lingia vo que per adaptamaints da terms chi’s haun da cunfer culla ledscha superiura ed in seguonda lingia vo que per adaptamaints e precisiuns invers la pratcha da la ledscha. La ledscha sur elavureda vain preschanteda ed appruveda da la radunanza cumünela.

 

 


Gemeinden