16.04.2021
La suprastanza da Celerina/Schlarigna ho l’intenziun da realiser la seguainta limitaziun dal trafic sül territori cumünel:

- Serreda da la Giassa da la Baselgia a l’otezza da la Baselgia Bel Taimpel

Il concept da trafic da la vschinauncha da Celerina/Schlarigna prevezza cha circulescha süllas vias da quartier plü pitschnas be auncha trafic d’apport dals abitants dal quartier.

Il trafic da transit e cun destinaziun in oters territoris dess circuler süllas vias da trafic principelas. La Giassa da la Baselgia es impü fich stretta ed cuntegna qualchünas sortidas da garaschas cun noscha survista. Cun quista imsüra po il trafic da transit gnir elimino.

La limitaziun da trafic planiseda es gnida autoriseda preliminermaing als 10 november 2020 da la Polizia Chantunela sün fundamaint da l’art. 7 al. 2 dal supplemaint tar la LTV (Ledscha federela davart il trafic sün via).

Objecziuns e posiziuns in connex cul uorden da trafic planiso paun gnir inoltredas infra 30 dis a partir da la publicaziun a la suprastanza cumünela da Celerina/Schlarigna.

Zieva l’examinaziun da posiziuns entredas decida la vschinauncha e publichescha sia decisiun i’l Fögl ufficiel dal chantun Grischun cun ün’indicaziun dals mezs leghels al Tribunel administrativ.
Suprastanza cumünela Celerina/Schlarigna
Celerina/Schlarigna, ils 17-04-2021
PDF herunterladen