In occasiun da sias tschantedas düraunt il mais da meg 2019 ho il cussagl cumünel da Zuoz traunter oter decis il seguaint:
Fabricas: Simon Salzgeber, S-chanf: contrat da servitut süllas parcellas 152, 2265 e 2351 in connex culla rait da chalur a distanza.
Dumandas da sustegn finanziel: Ils duos fradgliuns Anja e Maurus Lozza sun atlets da passlung e faun part dal cader C da Swiss Ski, e que cun grand success. Il cussagl decida da sustgnair ils duos sportivs eir per la stagiun 2019/2020.
L’organisaziun dal Engadin Art Talks EAT, chi’d es nouv gnida valüteda scu Diamond Event da la destinaziun, festagescha l’an chi vain sieu deschevel anniversari. Our da quel motiv vöglian els publicher üna publicaziun da giubileum. Il cussagl decida da sustgnair quist proget scu oters progets da cudeschs e publicaziuns.
Collavuraziun regiunela: Decisiun a reguard cunvegna da prestaziun sviluppeder regiunel, termin 30 gün 2019: Las lavuors dal sviluppeder regiunel in Engiadin’Ota, chi nun es actuelmaing avaunt maun, vegnan effettuedas da differentas persunas chi sun impieghedas da la Regiun. Per pudair cuntinuer culs progets inizios dess la cunvegna da prestaziun gnir prolungeda per ün an.
Discussiun a reguard cunvegnas da prestaziun in generel cun termin 31 december 2019: Diversas cunvegnas da prestaziun (immundizchas, chüra e fliamaint, cudesch fundiari, scoula da musica e destinaziun turistica) scroudan süls 31 december 2020 respectivmaing as prolungeschan automaticamaing scha nu vain fat desditta. Il cussagl es a priori da l’avis da cuntinuer las differentas collavuraziuns regiunelas ma da ponderer e sclarir sch’ün augmaint da las düredas da quatter sün desch ans nu fess sen. Da sclarir es scha las cunvegnas da prestaziun stöglian insomma gnir suottamissas a la radunanza cumünela scha vegnan simplamaing prolungedas sainza müdamaints.
Infurmaziuns our da tschantedas da cumischiuns: Fundaziun da sandet Engadin’Ota: il cussagl vaiva decis in lügl 2018 da vulair deleger il president cumünel aint il cussagl da fundaziun, ma sainza effettuer üna tscherna ufficiela. Pervi da que tscherna il cussagl in quist’occasiun il president cumünel scu delegio aint il cussagl da fundaziun da la fundaziun da sandet Engiadin’Ota.
Cumischiun da Chalandamarz: Ludwig Magni ho inoltro sia desditta zieva 15 ans servezzan per quista cumischiun. Il cussagl ingrazcha per la granda lavur prasteda. Ad es uossa da sclarir la nouva cumposiziun da la cumischiun. (cd)