21.01.2022
Zieva avair sclarieu la situaziun d’abiter sün basa da l’art. 21 da la ledscha chantunela davart la planisaziun dal territori (LPTGR), decretescha la suprastanza cumünela üna zona da planisaziun per tuot las parcellas illa zonas dal territori cumünel, e que i’l sen da l’art. 12 al. 1 da la ledscha federela davart las abitaziuns secundaras (LAS) per eviter svilups na giavüschos.

Böts da la revisiun:
- mantgnair il spazi d’abiter pajabel per la populaziun dal lö (persunas cun domicil resp. cul center da la vita illa vschinauncha)
- s-chaffir nouv spazi d’abiter pajabel per la populaziun dal lö
- mantgnair e s-chaffir spazi d’abiter pajabel per las persunas chi lavuran illa hotellaria u in intrapraisas da la vschinauncha
- mantgnair attractiv e viv il center d’abiter da Segl

Imsüras pussiblas per ragiundscher il böt da planisaziun:
- prescripziuns per limiter l’ütilisaziun ed il müdamaint d’ütilisaziun scu eir müdamaints da las abitaziuns da dret vegl i’l sen da l’art. 12 al. 2 LAS
- müder resp. intensiver las prescripziuns davart la düreda da l’oblig da prümas abitaziuns per las prümas abitaziuns existentas i’l sen da l’art. 5 da la ledscha cumünela davart las seguondas abitaziuns
- la vschinauncha promouva e s-chaffescha prümas abitaziuns pajablas per la populaziun dal lö

Illa zona da planisaziun nu suos-cha gnir fat ünguotta chi pudess render difficilas u impedir las imsüras planisedas. Progets da fabrica nu suos-chan gnir permiss, sch’els pudessan cuntradir a las prescripziuns planisedas (art. 21 al. 2 LPTGR).

La suprastanza s’arsalva il dret da concretiser cur cha que saja la zona da planisaziun tuot tenor il stedi actuel da la planisaziun u da la adatter a tel.

La zona da planisaziun vela a partir da dalum fin cha las nouvas disposiziuns previsas aintran in vigur, il pü lönch però fin duos ans zieva quista publicaziun. Arsalveda resta üna prolungiaziun da la zona da planisaziun cun appruvaziun dal Chantun.

La decretaziun da la zona da planisaziun po gnir contesteda tar la Regenza infra 30 dis daspö la publicaziun a maun d’ün recuors da planisaziun (art. 101 al. 1 LPTGR).
Segl, ils 22 schner 2022
LA SUPRASTANZA CUMÜNELA
DA SEGL
PDF herunterladen