Noviteds dal cussagl cumünel da Zuoz
In sias ultimas tschantedas ho il cussagl cumünel traunter oter tratto e decis sur dal seguaint:
Proget forestel Scrigns (SIE)
Il proget cumpiglia trais parts: la sanaziun da la via d’access (Drosa e Punt Drosa) cun diversas imsüras, la sanaziun da la Punt da Scrigns cun diversas imsüras e la protecziun dad erosiun tar l’Ova da Trupchun. Il batschigl per ova da stüzzer tar la Punt da Scrigns nu fo pü part dal proget. Il proget vain subvenziuno per üna buna part scu tuot ils progets SIE forestels dal chantun. Per Zuoz restan cuosts da CHF 65‘263.70. Las lavuors vegnan realisedas cun quist proget our da duos motivs principels: La necessited es deda ed il chantun sustegna il proget finanzielmaing. Il cussagl cumünel decida dad aderir al proget ed ils cuosts scu manzuno.
Strategia d’energia regiun Malögia – rimbomb sün imsüras ed arcumandaziuns
Illa conferenza dals presidents cumünels da la Regiun Malögia es gnida elavureda e discuteda üna strategia d’energia regiunela. Our da la strategia sortan trais propostas per imsüras chi sun uossa in consultaziun da las vschinaunchas. La prüm’imsüra es l’introducziun dad ün instituziun per support e consultaziun per las vschinaunchas in dumandas dad energia. La seguonda proposta es ün’analisa da potenziel sur da purteders d’energia primars, voul dir laina, chalur dal terrain, ova da fuonz, sulagl eui.. La terz’imsüra es il deposit da datas sül GIS da la Regiun Malögia. Il cussagl cumünel es zieva cuorta discussiun unanimamaing da l’avis cha quist nu sun lezchas da la regiun Malögia. Que do avuonda dittas privatas cun quista spüerta ed il maun public nu dess concurrenzer quistas. Las imsüras nu vegnan dimena sustgnidas dal cussagl cumünel.
Tariffa per charger autos electrics i’l Parkegi Centrel
Sün basa da l’installaziun dad ün nouv indriz da charger autos electrics ho la vschinauncha calculo nouv la tariffa. Speciel es cha l’indriz i’l Parkegi Centrel lascha al mumaint be tiers ün pajamaint pauschel, independent da la quantited d’energia chi vain chargeda. Siand cha veiculs haun differentas capaciteds da battaria, es la tariffa finela üna tariffa masdeda. La calculaziun preschanteda basescha sün ün Tesla cun üna capacited da 90 uras kW, ed ün pitschen Renault Zoë cun 52 uras kW ed ün predsch da basa da 20 u 25 raps per ura kW. La calculaziun muossa imports traunter CHF 13.00 e CHF 22.50 e la direcziun operativa fo la proposta dad ün tariffa masdeda da CHF 18.00. Il cussagl cumünel aderescha unanimamaing a la proposta da CHF 18.00 per chargia. Impü incumbenzescha il cussagl cumünel la direcziun operativa dad evaluer a media vista ün müdamaint sün ün sistem da pajamaint chi permetta dad inchascher la quantited dad energia chi vain effectiv chargeda.
Chalandamarz 2023 – proposta da la cumischiun da Chalandamarz a reguard l’integraziun da las mattas.
Il vicepresident preschainta las propostas da la cumischiun da Chalandamarz per la realisaziun dal Chalandamarz cul ’integraziun maximela da las mattas. Seguaintas propostas fo la cumischiun:
Las mattas üngüna s-chella, blusa blova, chapütscha e fazöl cotschen, patrunas adüna cun costüm Engiadinais. Schlupper la geischla: tenor uorden, mats e mattas.
Prouva: patruns, patrunas, mats, mattas; tuots cun blusas blovas, chapütschas e fazöls cotschens, las mattas sainza s-chella.
Clamer our: Patruns e patrunas claman our be ils mats.
Chanter in chesa: in uorden. Tschaina tradiziunela ils 1. marz: mats e mattas.
Chalandamarz: patrunas costüm Engiadinais ils 28 favrer e 1. Marz.
Il cussagl cumünel es perinclet cullas propostas, agiundscha auncha cha’l transport dals iffaunts vi Madulain ed inavous dess in mincha cas avair lö per tuots cun chavagl e charrozza.
Fös artificiels – nouv reglamaint
Il cussagl cumünel conferma il nouv reglamaint per fö clers. Quist scumanda in fuond fös clers sül territori da Zuoz cun excepziun dals 1. avuost chi lascha tiers fö clers scu fin uossa. Cun quista decisiun as mouva la vschinauncha da Zuoz i’l ram da l’agir dad otras vschinaunchas in Engiadina. La vschinauncha da Zuoz renunzcha in futur, scu già i’ls ultims ans, da spordscher ün fö artificiel a Silvester. Il nouv reglamaint as chatta sülla pagina d’internet da la vschinauncha da Zuoz.
Nouv collavuratur servezzan tecnic
Süls 1. schner 2023 ho il cussagl cumünel tschernieu a sar Gian Paul Derungs da Zuoz scu nouv collavuratur dal servezzan tecnic. Las lavuors dal servezzan tecnic cumpiglian il territori da las vschinaunchas da Zuoz e S-chanf. Il cussagl cumünel gratulescha a sar Gian Paul Derungs per la tscherna e s’allegra sün üna buna collavuraziun.
Tschernas da Chalandamarz 2023
Il cussagl cumünel constata cha fin al mumaint sun seguaintas caricas in tscherna a las tschernas da Chalandamarz ils 1. marz 2023: Tschernas da rimplazzamaint do que pel presidi cumünel e per ün sez i’l cussagl cumünel. Tuottas duos tschernas per ün an. Pel cussagl cumünel do que impü duos sez chi sun reguler in tscherna. Illa cumischiun sindicatoria es ün sez in tscherna, scu eir illa cumischiun da fabrica. Tenor constituziun cumünela velan titulers chi sun reelegibels scu proponieus, sch’els nun haun comunicho al cussagl cumünel lur demischiun in scrit almain 4 eivnas aunz il di da las tschernas.
Incherimaint salaris cumünels
Il cussagl cumünel segua a l’agir dal chantun es aderescha ad ün incherimaint dals salaris cumünels da 2.7%. Aint il preventiv 2023 aderieu da la radunanza cumünela già in november 2022 es sto resguardo ün supplemaint da salaris.