04.08.2023
Sün basa da l’art. 16 e l’art. 21 da l’ordinaziun chantunela davart la planisaziun dal territori (OPTGR) ho la suprastanza cumünela da Silvaplauna decis a la tschanteda dals 24 lügl 2023 l’intenziun d’introdür l’aboliziun parziela dal plaun da quartier Foppas ost. L’aboliziun parziela aintra pür in vigur cun l’appruvaziun da la revisiun parziela da la planisaziun locala Foppas chi’d es exposta a listess temp per la cooperaziun.
Intent: Intent: Il plaun da quartier Foppas ost es entro in vigur als 19 december 1994. Il plaun da quartier Foppas ost cumpiglia hoz las parcellas nr. 273, 571, 625, 633, 672, 754, 755, 756, 772 e 2131.
Il plaun da quartier Foppas ost existent cuntegna be per la part A (parcellas nr. 571, 672, 754, 755, 756 e 772) prescripziuns detagliedas. Per la part B (parcellas nr. 271, 625, 633 e 2131) es gnieu elavuro unicamaing ün plaun directiv chi regla ils trats fundamentels per la planisaziun da quartier detaglieda chi segua.

Causa ils cuntgnieus incumpatibels da la revisiun parziela da la planisaziun locala da la zona d’abiter e d’hotels Foppas, chi’d es exposta a listess temp per la cooperaziun, dess il plaun da quartier Foppas ost gnir abolieu per la part B. Ils cuntgnieus ils pü importants pel proget vegnan reglos i’l plaun generel da furmaziun ed i’l plaun generel d’avertüra scu eir illas prescripziuns per las zonas. Uschè vain garantida üna surfabricaziun regleda eir sainza plaun da quartier.
Il plaun da quartier Foppas ost vain abolieu parzielmaing a pêr ed a pass cun la revisiun parziela da la planisaziun locala da la zona d’hotels Foppas. L’aboliziun parziela pertuocha la part B. L’exposiziun publica da l’aboliziun ho lö a listess temp scu l’exposiziun da cooperaziun da la revisiun parziela da la planisaziun locala.
Territori dal plaun da quartier ed exposiziun: La cunfinaunza da l’aboliziun parziela resorta dal plaun introductiv 1:500 davart l’aboliziun parziela dal plaun da quartier Foppas ost. Quel es expost ad invista dals 7 avuost als 6 settember 2023 (30 dis) illa chanzlia cumünela düraunt las uras d’avertüra dal fnestrigl u tenor cunvegna (tel. 081 838 70 70).
Pussibilted da recuors: Cunter l’introducziun da l’aboliziun parziela dal plaun da quartier e cunter la cunfinaunza da l’aboliziun parziela dal plaun da quartier po gnir fat recuors in scrit e cun motivaziun tar la suprastanza cumünela.
La suprastanza cumünela da Silvaplauna
Il president: Daniel Bosshard
La chanzlista: Franzisca Giovanoli
Silvaplauna, ils 5 avuost 2023
PDF herunterladen