Noviteds dal cussagl cumünel da Zuoz
In sias ultimas tschantedas ho il cussagl cumünel traunter oter tratto e decis sur dal seguaint:
S-chanf do la desditta a la cunvegna da collavuraziun in connex cun la gestiun forestela e la gruppa per lavuors cumünelas
La suprastanza cumünela da S-chanf ho inoltro la desditta da la collavuraziun süls champs dal servezzan tecnic e forestel per la fin da l’an 2023 cun ün temp da prolungiaziun fin ils 30 avrigl 2024. A reguard la gestiun dal provedimaint d’ova da la vschinauncha da S-chanf sun auncha in via trattativas scu cha’l futur guard’oura. Üngünas consequenzas ho la decisiun da la suprastanza da S-chanf per ils collavuratuors dal servezzan tecnic, chi sun e restan impiegos da la vschinauncha da Zuoz.
Taxas da giasts individuelas per l’an 2024
La ledscha a reguard taxa da giasts e promoziun turistica es gnida sur elavureda. La taxa da giasts individuela, cha affers dad allogi paun inchascher da lur giasts, vain definida dal cussagl cumünel. Fin uossa es l’import sto definieu sün CHF 4.00 per pernottaziun ed il cussagl cumünel decida da lascher l’import da la taxa da giasts individuela sün CHF 4.00.
Plan da quartier Curtin Plavaunt II
Il cussagl cumünel ho, basand sül artichel 19 alinea 1 da l’ordinaziun davart la planisaziun dal territori per il chantun Grischun, appruvo il plan da quartier Curtin Plavaunt II, existent our da las prescripziuns dal plan da quartier, il plan da furmaziun ed il plan d’access. La publicaziun ho gieu lö a partir dals 1. favrer 2024.
Hotel Botta – Chaunt da Crusch
Zieva cha la fabrica dal nouv hotel Botta in Chaunt da Crusch sto già püs mais salda ho il cussagl cumünel da Zuoz piglio sü contact cul possessur dal nouv hotel per sclarir la cuntinuaziun e finischun da las lavuors. Il böt dal cussagl cumünel es in generel dad avair dapü lets chods, voul dir dad hotellaria. El sclarescha las pussibiliteds da la vschinauncha per accelerer e pussibilter da conclüder la fabrica.
Revisiun totela da la planisaziun dal lö
In lügl 2023 ho la vschinauncha da Zuoz clappo inavous ils resultats da l’examinaziun preliminera per la revisiun da la planisaziun dal lö. Que zieva avair inoltro tela al chantun Grischun in schner 2022. Daspö lügl 2023 sun la cumischiun da planisaziun ed il cussagl cumünel vi dal elavurer ils rimbombs e tschegns dals uffizis chantunels. Quista lavur es illas ultimas trattas. Previs es la publicaziun da la revisiun totela da la planisaziun dal lö düraunt il mais avrigl 2024 chi includa eir üna saireda d’infurmaziun.
Sela Pradels – indriz sanitar permanent
L’andamaint dad evenimaints illa Sela Pradels ho musso cha ün’infrastructura sanitara permanenta es necessaria. Zieva avair examino differentas idejas e variantas decida il cussagl cumünel dad installer ün tualetta prefabricheda in simila qualited scu las tualettas chi gnivan fin uossa pigliedas a fit. L’indriz vain installo i’l chantun vers süd e do cun que eir ün adöver a la Golf Engadin St. Moritz AG, chi’s partecipescha vi dals cuosts.
Nouva magistraglia per la scoula primara Zuoz/Madulain
Il cussagl cumünel tscherna pel nouv an da scoula 2024/25 a duonna Luana Oswald scu pedagoga curativa ed a duonna Ursina Rutishauser scu magistra primara da la scoula primara da Zuoz/Madulain. Sinceras gratulaziuns!
Schoglimaint consorzi scolaziun curativa Engiadin‘Ota
Ils delegios da las vschinaunchas partecipedas vi dal consorzi haun in occasiun da lur tschanteda decis da schoglier tel. Vi dal cussagl cumünel es que da confermer il schoglimaint. Cul schoglimaint vain pajo inavous il chapitel dal consorzi a las vschinaunchas. La scolaziun curativa nu vain già daspö püs ans spüerta dal consorzi in Engiadin’Ota, dimpersè da l’organisaziun Giuvaulta, chi metta la spüerta in quint directamaing a las vschinaunchas. Il cussagl cumünel piglia a cugnuschentscha il schoglimaint dal consorzi scolaziun curativa Engiadin’Ota e conferma tel.
Dumanda da sustegn Chesa Planta Samedan
La Chesa Planta Samedan ho inoltro üna dumanda da sustegn per ün proget chi sur elavurescha e adaptescha ils mezs d’instrucziun da lingua Rumauntscha. Culla dumanda da sustegn ho la Chesa Planta Samedan inoltro ün preventiv per las lavuors chi cumpiglia ün import dad expensas da totel CHF 63‘000.00. Il cussagl cumünel da Zuoz decida da sustegner la chosa cun CHF 1‘000.00.
Dumanda da finanziaziun d’evenimaints tres la Engadin Tourismus AG
Zieva cha San Murezzan nu fo pü part da la destinaziun ho tela fat la dumanda sur la conferenza da presidents da la Regiun Malögia da coordiner la finanziaziun dad evenimaints a partir dal 2025 darcho sur la Engadin Tourismus AG. Il cussagl cumünela decida da na aderir a la dumanda. Ils motivs sun cha la magiurited dad evenimaints sustgnieus ho lö a San Murezzan e düraunt la stagiun ota. Natürel sto que liber als singuls comitès dad organisaziun dals evenimaints pertuchos dad inoltrer üna dumanda da sustegn directamaing tar la vschinauncha da Zuoz, respectivmaing tar la Engiadina Plaiv Turissem.
Radunanza cumünela dals 27 marz 2024
In marculdi ils 27 marz 2024 ho lö a las 20:15h üna radunanza cumünela per tractander duos dumandas da credit. Dad üna vart vo que per la finanziaziun dals progets plazza da scoula, tualetta publica e l’infrastructura correspundenta. E seguonda vain tratteda la dumanda da credit per l’ultima etappa dal rimplazzamaint da repars da lavinas sün Albanas.