Noviteds dal cussagl cumünel da Zuoz
In sias ultimas tschantedas ho il cussagl cumünel traunter oter tratto e decis sur dal seguaint:
Fundaziun provedimaint da sandet SGO – dumanda da credit supplementer, deficit 2023Scu cha’s ho pudieu ler eir illas medias, sun las vschinaunchas da la Regiun Malögia confruntedas culla dumanda da la fundaziun pel provedimaint da sandet per l’Engiadin’Ota (SGO) per ün credit supplementer da CHF 5.0 milliuns. La vschinauncha da Zuoz contribuescha minch’an fingià CHF 70‘000 tenor ledscha, impü CHF 150‘000 tenor cunvegna da prestaziun e CHF 150‘000 scu garanzia da deficit per la chesa da fliamaint. Uossa s’amunta l’import pel deficit da l’an 2023 per la vschinauncha da Zuoz ulteriurs CHF 305‘000. Il cussagl cumünel es da l’avis cha’l provedimaint da sandet es fich important e cun que eir il pajamaint dal deficit. Al listess mumaint inviescha il cussagl cumünel imsüras per sgürer, cha in futur as po eviter ün deficit i’l ram da l’an 2023. Impü pretenda il cussagl cumünel da Zuoz da la SGO dad incumbenzer differentas persunas independentas per tratter las differentas variantas per la gestiun futura da l’ospidel. Il cussagl cumünel preschainta la dumanda per ün credit supplementer a la radunanza cumünela dals 26 gün e cussaglia dad aderir a tel.
Management dad ova – stüdi e cussagliaziunLa vschinauncha da Zuoz perseguitescha daspö divers mais ün proget pel management dad ova insembel cullas otras vschinaunchas da la Plaiv ed impü Bever. Per cuntinuer las lavuors ed evaluer l’infrastructura actuela e datas actuelas fo la gruppa da lavur la dumanda da surder quist’analisa a la ditta specialiseda Rissi + Partner AG. Ils cuosts totels s’amuntan a CHF 24‘731.25. Las tschinch vschinaunchas partecipedas as spartan ils cuosts democratic. Quists cuosts nu sun stos pussibel da planiser. Il cussagl cumünel es perinclet e deliberescha CHF 5‘000.00 scu credit dal cussagl cumünel per la part da Zuoz.
Clucher San LuziLa vschinauncha da Zuoz es daspö pü lung temp landervi dad eruir la problematica dal clucher San Luzi. La gruppa da lavur in chosa ho dumando offertas per üna ulteriur’evaluziun. Il cussagl cumünel deliberescha CHF 10‘000 a favur dad ün’evaluaziun culla ditta Muff Kirchentechnik AG.
Simon Salzgeber – reponderaziun drets da passagi per augmanter la rait da chalur distantaIn üna prüma decisiun nun ho il cussagl cumünel aderieu a la dumanda per drets da passagi. L’affer es darcho tractando zieva cha’d es gnieu comunicho cha la fabrica dal hotel Engiadina stu realiser ün attach d’ova tar la Passarella e perque cruscher il Stradun. Que dess a Simon Salzgeber la pussibilited da fabricher aint las lingias per la chalur distanta. Il mneder tecnic da la vschinauncha e respunsabel pel provedimaint ho sclarieu ch’ün nouv attach per l’hotel Engiadina nu fo dabsögn. Cur cha la vschinauncha ho sano il Stradun avaunt ans, as ho giosom la Via Chöntschet preparo ün attach dad ova, per cha nu’s ho da chaver sü tel. Il cussagl cumünel decida da propuoner a sar Simon Salzgeber la pussibilited da cruscher il Stradun a 4 fin 5 lös decisivs per spordscher a grandas parts da la vschinauncha ün attach vi da la rait da chalur distanta. La proposta es lieda vi da resalvas. Il cussagl cumünel pretenda cha’ls lös per cruscher il Stradun sun definieus, oters nu do que in futur. Sün Plaz es da definir ün zona cotschna inua ch’üngüns s-chevs nu vegnan permiss. Impü vain prescrit a sar Simon Salzgeber dad installer lingias cun diameters sufficiaints per cuntinuer pü tard la rait da chalur.
Cunvegna da prestaziun Parc Naziunel SvizzerSiand cha’l Parc Naziunel Svizzer cumbatta eir cun sfidas finanzielas ho‘l fat il pass vers la conferenza dals presidents cumünels da la Regiun Malögia per dumander per sustegn. L’an 2020 ho il Parc Naziunel Svizzer già üna vouta inoltro üna dumanda e’l cussagl cumünel as ho dedicho a la tematica. Zieva cha tschertas aspettativas da la vschinauncha da Zuoz nu sun gnidas accumplidas, nun ho il cussagl cumünel aderieu a la dumanda da sustegn. Intaunt as haun sviluppedas differentas robas e tschertas pretaisas turisticas dal 2020 sun intaunt inviedas u realisedas. Il cussagl cumünel es perinclet ed aderescha a la dumanda da sustegn chi resulta in üna cunvegna da prestaziun pels ans 2025 fin 2028 e cuosta a la vschinauncha da Zuoz CHF 6‘297 per an.
Localiteds Tuor – fitteda al archiv culturel Engiadin‘OtaIl cussagl cumünel decida da fitter localiteds illa Tuor al archiv culturel Engiadin’Ota chi fo müdeda a Zuoz düraunt la sted 2024. L’archiv planisescha differentas exposiziuns illa Tuor. Düraunt la sted 2024 ho lö l’exposiziun „Splendur e Sumbriva“, zieva haun lö differentas exposiziuns, traunter oter üna sur da l’istorgia da l’hotelleria. Nozzas civilas paun düraunt la fitteda avair lö illa sela dal circul illa Tuor.
Dumanda da sustegn LÄSER&BÄRTSCH TanzTheaterLa societed LÄSER&BÄRTSCH TanzTheater ho inoltro üna dumanda da sustegn per ün proget da teater da sot. Que’s tratta dad üna seguonda producziun zieva cha dal 2023 haun els gieu success cun „BEASTS – Blue hour at Macbeth’s“. La producziun tratta ils temas identited, autarchia e’l metter in dumanda la rolla dal sex biologic. Sper producziuns a Cuira vain il töch eir musso a Zuoz i’l Zuoz Globe dal Lyceum Alpinum Zuoz. Il cussagl cumünel aderescha a la dumanda da sustegn e deliberescha CHF 5‘000.
Dumanda Zuoz Globe – prolungiaziun cunvegna da prestaziunLa prüma cunvegna d’eira pels ans 2021 fin 2024. Il Zuoz Globe cun tuot la spüerta culturela es ün dals pilasters culturels a Zuoz e fo part da la strategia Zuoz 2025 in chosa. Il cussagl cumünel decida da prolunger la cunvegna da prestaziun pels ans 2025 fin 2028 cun ün import annuel da CHF 5‘000.00.
Sgürezza IT – „Quick Perimeter Test“ (InfoGuard)Il cussagl cumünel vaiva decis da piglier a maun ün evaluaziun externa da l’infrastructura dad IT ill’administraziun cumünela. La ditta InfoGuard- Swiss Cyber Security ho inoltro ün offerta chi cumpiglia üna controlla automatiseda da l’infrastructura chi’d es exponida i’l internet. Cuntgnieu es ün’analisa da fermezzas e deblezzas, üna valütaziun dal stedi da ris-ch e propostas concretas dad imsüras per correger eventuelas deblezzas. Il cussagl cumünel deliberescha CHF 6‘000.00 per realiser ün test scu offert.
Concurrenza d’architectura PlagnoulaIl cussagl cumünel vain oriento sur da la concurrenza d’architectura per nouv‘infrastructura da scoulina e scoula in Plagnoula. Entros sun totel 66 progets. Las pretaisas priorisedas sun stedas ils cuosts, l’integraziun i’l purtret dal lö e la funcziunalited our da la perspectiva da la scoula. Sur tuot ils progets nun accumplescha üngün las pretaisas 100%. Il proget sülla seguonda plazza ho deficits tar la funcziunalited scolastica cun duos edifizis ed ils cuosts chi sun memm’ots. Il proget sülla prüma plazza accumplescha üna granda magiurited da las pretaisas e po gnir sur elavuro e sviluppo illa güsta direcziun. Impustüt nu cuntainta la furmaziun dal chamin sül tet e la fatscheda previssa. Il depüto scoula declera, perche ch’ün svilup da l’infrastructura da scoula fo dabsögn. L’instrucziun svess e las pretaisas a l’infrastructura s’haun sviluppedas enorm i’ls ultims ans. La situaziun dad hoz dumanda zieva localiteds pü grandas ed eir pü numerusas per quasi cumpiglier la classa pitschna, chi nu do pü, illa classa normela. L’inclusiun maximela ho scu resultat cha las localiteds haun da spordscher plazza e fuorma per ün’instrucziun cumplessiva moderna. Sur da la cuntinuaziun dal proget discuta il cussagl cumünel in occasiun dad üna da las prosmas tschantedas dal cussagl cumünel.
Dumanda da sustegn – Nordic Events Engadin, cuorsas da passlung coppa mundiela 2025 – 2029La dumanda da sustegn da Nordic Events Engadin prevezza ün sustegn spartieu traunter las vschinaunchas da la Regiun Malögia tenor clev regiunela. La dumanda es gnida surdeda a la Engiadina Plaiv Turissem (EPT) per üna valütaziun. Quista cuntegna la proposta cha’l lö da cumpetiziun Silvaplauna porta la mited dal sustegn e l’otra mited vain purteda da las otras vschinaunchas tenor clev turistica. Il cussagl cumünel decida da na aderir ad ün sustegn da cuorsas da passlung da la coppa mundiela. Que our dal motiv principel cha las cuorsas haun lö düraunt la stagiun ota. La vschinauncha da Zuoz focusescha il sustegn sün evenimaints illa stagiun bassa. Impü sustegna la vschinauncha da Zuoz la cuorsa „La Diagonela“ cun ün import considerabel. Zuoz as vezza inavaunt scu destinaziun da passlung e sustegna inavaunt il „Engadin Skimarathon“ e continuescha eir cun investiziuns i’l passlung scu i’l passo (infrastructura per l’innaivamaint artificiel). Il cussagl cumünel sustegna eir il plan da master passlung illa Regiun Malögia.