Noviteds dal cussagl cumünel da Zuoz
In sias ultimas tschantedas ho il cussagl cumünel traunter oter tratto e decis sur dal seguaint:
Cussagl cumünel 2024/2025
Scu vicepresidenta resta duonna Ladina Tarnuzzer in carica. Il scumpart da decasteris per l’an da legislatura 2024/2025 decida il cussagl cumünel seguaintamaing:
Ladina Tarnuzzer: Turissem, cultura
Cristian Ferrari: Vias, provedimaint d’ova, chanalisaziun, iglüminaziun, stabels cumünels
Alexandra Blumenthal: Fabricas, planisaziun, ambiaint ed energia
Jachen Delnon: Finanzas, provedimaint da sandet e provedimaint sociel
Flurin Wieser: Agricultura, alps, pasculs e gods, digitalisaziun, immundizchas, trafic public
Romeo Cusini: Administraziun cumünela, persunel, sgürezza publica, Aeroport regiunel Samedan (Infra RFS), Scoula (s-chelin ot)
Sandra Zala: Scoula (s-chelin bass), sport, economia publica
Cumischiuns permanentas
Il cussagl cumünel conferma las cumischiuns permanentas culs müdamaints zieva las tschernas da Chalandamarz. Que pertuocha il cussagl da scoula primara chi vain nouv mno da la depüteda da scoula pel s-chelin bass, duonna Sandra Zala. I’l cussagl da scoula dal s-chelin ot, vain la vschinauncha rapreschanteda dal president cumünel. Illa cumischiun sindicatoria es gnida tschernida duonna Alice Bührer. Nouva presidenta da la cumischiun sindicatoria es duonna Andrea Hardegger. La constituziun da tuot las cumischiuns permanentas es publicheda a la tevla naira in Chesa Cumünela e sülla pagina d’internet (www.zuoz.ch). Sper las cumischiuns permanentas clama il cussagl cumünel gruppas da lavur, chi vegnan installedas tenor dabsögn.
Dumanda vschinauncha S-chanf – Furniziun ova potabla sur lingia existenta
La situaziun es cuntschainta, cha la vschinauncha da S-chanf ho al mumaint memma pocha ova potabla. A buocha es avaunt maun la dumanda dal president cumünel da S-chanf, scha la vschinauncha da Zuoz füss pronta da furnir ova potabla a la vschinauncha da S-chanf. Ils sclarimaints tecnics per fer que sun fats, la lingia es eir già nettageda ed ils respunsabels dal chantun involvos. L’indriz per furnir ova our dal reservuar da Zuoz prevezza üna controlla da qualited aunz scu entrer i’l reservuar da S-chanf. Il cussagl cumünel decida unanimamaing dad aderir a la dumanda da la vschinauncha da S-chanf e da furnir ova potabla. Que suot la premissa cha la quantited dad ova lascha tiers que. Il predsch as drizza zieva il predsch cha eir abitantas ed abitants da Zuoz pejan. Il cussagl cumünel dumanda la vschinauncha da S-chanf il dret vicendaivel da pudair retrer ova da S-chanf in ün cas cha Zuoz es in üna simila situaziun.
Clucher San Luzi
La ditta Muff Kirchturmtechnik AG ho elavuro ün concept per schoglier ils duos problems cuntschaints i’l clucher San Luzi. Ün es la problematica da l’oscillaziun dals sains, impustüt sain nr. 3, chi nun es al mumaint in funcziun. L’otra sfida es da metter ad ir darcho il cling oriund dals sains, chi’d es gnieu influenzo negativmaing cullas imsüras dals ans 2004 fin 2010. Il concept da sanaziun preschanto basescha süll’elavuraziun da la situaziun actuela cha la ditta Muff ho piglio sü detagliedamaing. Las imsüras propostas cumpiglian divers pass e differentas imsüras per metter ad ir tuot la tecnica per suner tuot ils sains cul cling oriund e tipic per la regiun. Scu prüm pass dess gnir realiseda ün’imsüraziun da l’oscillaziun dals differents sains singuls ed in cumbinaziuns. Las imsüras tecnicas cumpigliessan indrizs cun perpendiculs cunter l’oscillaziun dals sains per egualiser l’oscillaziun. Impü il fabricher inavous ils giufs ed ils battagls dals sains illa fuorma oriunda per realiser darcho las frequenzas da pü bod. Impü druvess que adaptamaints dals indrizs electrics ed dals motors dals sains per esser sül stedi dad hozindi. La chadregia dals sains es in fuonz in ün bun stedi e po gnir adapteda. Eir la construcziun dal tet dumanda zieva adaptamaints, eir per l’access e la sgüraunza. Ün prüm pass dal concept cumpiglia diversas imsüraziuns per cuosts offerts da CHF 14‘000.00, chi vaun a charg dal conto mantegnimaint dal clucher San Luzi. La ditta Muff Kirchturmtechnik AG clappa l’incumbenza cullas lavuors tenor offerta. Las lavuors paun gnir pigliedas a maun a partir dals 16 settember 2024.
Sanaziun Surmulins – surdeda lavuors d’indschegner
Il cussagl cumünel vaiva decis i’l proceder d‘invid dad invider las dittas Pini Group AG San Murezzan, Caprez Ingenieure AG San Murezzan e la ditta Fromm + Partner AG, La Punt Chamues-ch. Entredas sun duos offertas, la ditta Fromm + Partner AG ho renunzcho sül inoltrer üna. Sün dumanda da la vschinauncha da Zuoz ho la Fromm + Partner AG alura surpiglio la controlla e la valütaziun da las offertas entredas e propost da surder las lavuors d’indschegner a la ditta Pini Group AG pel predsch da CHF 193‘901.55 incl. IPV. Il cussagl cumünel decida unanimamaing da seguir a la proposta e surdo las lavuors d’indschegner per la sanaziun Surmulins a la ditta Pini Group AG da San Murezzan per l’import da CHF 193‘901.55.
Trenamaint d’inviern cun autos „Winterfahrtraining-Angebot“
La ditta Golf Engadin St. Moritz AG vaiva inoltro in marz 2024 üna dumanda per darcho arrandscher ün trenamaint d’inviern cun autos. Il cussagl cumünel ho dumando a l’organisaziun da sclarir divers puncts scu eir oters lös. In lügl 2024 ho l’organisatur inoltro üna nouva dumanda culs sclarimaints dumandos ed ün concept chi correspuonda a las aspettativas dal cussagl cumünel. Quist cuntegna cha’l cliaint chi nu’s ho tgnieu vi da las reglas l’ultim inviern nun es pü permiss e cha per tuot ils oters cliaints sun permiss be veiculs ibrids e la dumengia be veiculs electrics. Il cussagl cumünel es da l’avis cha suot las premissas dedas ed ils sclarimaints fats es la realisaziun pussibla. Il cussagl cumünel decida unanimamaing da der il permiss per la realisaziun da trenamaints da guida d’inviern tenor proposta.
Radunanza cumünela
Siand cha nu sun avaunt maun tractandas per la radunanza cumünela decida il cussagl cumünel cha la radunanza dals 28 avuost nun ho lö. La prosma radunanza cumünela ho lö ils 27 november 2024.