In sias ultimas tschantedas ho il cussagl cumünel traunter oter tratto e decis sur dal seguaint:
Ingrandimaint Parkegi Centrel – resultats retschercha ed agir
Düraunt la sted 2024 ho il cussagl cumünel fat üna retschercha sur dal interess vi dal acquist da parkegis illa vschinauncha da Zuoz. Da 760 questiunaris sun returnos 350, che chi correspuonda ad arduond 46%. Cun que as ho indicaziuns rapreschantativas. Ün interess da cumprer üna plazza da parker i’l Parkegi Centrel es gnieu exprimieu per 43 plazzas. Per plazzas da parker in direcziun da Madulain es eir avaunt ün interess per 28 parkegis. Il cussagl cumünel discuta ils resultats e l’agir futur dal cussagl cumünel in chosa. L’intaunt dal cussagl cumünel es da fabricher plazzas da parker in ün parkegi cuverno chi’s portan finanzielmaing svess. Per concretiser l’interess decida il cussagl cumünel dad elavurer cuosts da fabrica detaglios.
Pumpiers Plaiv – import da cumpensaziun
La cumischiun da pumpiers ho discuto la tematica da l’import da cumpensaziun, siand cha prossem an es da fer quint cun dapü annunzchas pels pumpiers. Que chaschuness dad üna vart ün augmaint da cuosts, ma eir per üna sfida pel cader, siand cha que nu do al mumaint avuonda glieud scoleda. La cumischiun da pumpiers fo la proposta da redür l’import da cumpensaziun da CHF 600.00 sün CHF 450.00. Il cussagl cumünel es unanimamaing perinclet e segua a la proposta.
Reglamaint per la promoziun da talents da Zuoz
Zieva üna dumanda privata per sustegn dad ün giuven atlet, ho il cussagl cumünel elavuro ün reglamaint chi regla il sustegn per talents da Zuoz. Il reglamaint definescha las cundiziuns e l’agir. Ils böts da quist sustegn finanziel sun dad onurer, rinfurzer e sustgnair la via instradeda süls champs da sport e cultura.
Plans da master passlung e trail inviern
Sün dumanda dals presidents cumünels ho Engadin Tourismus fat ün riassunt sur dals müdamaints importants i’ls plans da master passlung e trail inviern. Tels nu pertuochan la vschinauncha da Zuoz ed il cussagl cumünel piglia a cugnuschentscha il rapport. Il cussagl cumünel decida impü dad inoltrer üna remarcha a reguard la finanziaziun u üna strategia da finanziaziun per progets i’l ram da passlung e trail inviern. A dess gnir elavureda üna strategia da finanziaziun chi nu basescha unicamaing sül maun public.
Acziun promoziun bigliets da skis per iffaunts indigens
Il cussagl cumünel decida unanimamaing da cuntinuer cull’acziun cuntschainta da subsidier ils cuosts per bigliets annuels dad iffaunts da Zuoz cun CHF 150.00 per bigliet.
Contribuziun cumünela vi da bigliets da skis annuels per proprietarias e proprietaris da seguondas abitaziuns
La cunvegna da las vschinaunchas cull’organisaziun da trafic public in Engiadin’Ota prevezza cha las vschinaunchas subsidieschan bigliets annuels da proprietarias e proprietaris da seguondas abitaziuns cun 10% dals cuosts. Cun que sgüran las vschinaunchas la contribuziun da l’organisaziun da las pendiculeras Engiadin’Ota da CHF 440‘000.00 vi dal transport public. Il cussagl cumünel es unanimamaing perinclet da cuntinuer culla contribuziun via da bigliets annuels da proprietarias e proprietaris da seguondas abitaziuns.
FIS Snowboard, Freestyle e Freeski WM – dumanda da garanzia da deficit
Il comitè d’organisaziun dals champiunedis mundiels da Freestyle in marz 2025 ho inoltro üna dumanda per üna garanzia da deficit sur CHF 2.0 milliuns tar las vschinaunchas da l’Engiadin’Ota e la Bregaglia. Per la vschinauncha da Zuoz es tenor clev previs ün import da CHF 115‘000.00. La motivaziun per la dumanda sun l’incherimaint e cuosts chi nu pudaivan gnir calculos precis dal 2018, cur cha la finanziaziun es gnida planiseda. Il cussagl cumünel es zieva üna discussiun unanimamaing da l’avis da na aderir a la dumanda. Que cun l’argumaintaziun cha’l maun public as partecipescha già cun ün import considerabel vi da l’evenimaint. Impü es l’organisaziun respunsabla da realiser l’evenimaint i’l ram dal preventiv, chi stu permanent gnir adatto a la situaziun actuela.
Plan da finanzas 2025–2029
Il cussagl cumünel ho tratto sur püssas tschantedas il plan da finanzas pels ans 2025 fin 2029. Tuot las investiziuns, voul dir investiziuns pel provedimaint da basa scu la scoula, vias u il provedimaint d’ova fin tar investiziuns giavüschablas ma na ultimativ necessarias, sun gnidas valütedas, priorisedas missas i’l plan da finanzas u gnidas strichedas. Il böt dal cussagl cumünel es dad avair üna survista sur 5 ans che chi’d es finanzielmaing insomma pussibel. Cun que cha la magiurited dals cuosts dal preventiv sun cuosts externs, nu resta bger spazi per manövra. Il plan da finanzas serva scu mez da planisaziun e scu basa per il prossem preventiv. Per l’elavuraziun dal preventiv vain il prüm actualiso il plan da finanzas.
Preventiv 2025
Il preventiv 2025 es gnieu elavuro sur diversas tschantedas. Il cussagl cumünel es confrunto cun grandas expensas per gestiuns externas (impustüt la fundaziun pel provediamaint da sandet). Ils cuosts e las entredgias planisedas i’l preventiv as basan sül preventiv da l’an passo e süllas cifras actuelas da l’an curraint. Il pè d’impostas dess gnir lascho sün 65%. Finelmaing deliberescha il cussagl cumünel il preventiv 2025 cun ün suravaunz da las expensas da CHF 970‘871.00. Il preventiv d’investiziuns 2025 prevezza ün totel dad investiziuns nettas da CHF 7‘820‘300.00.