In sias ultimas tschantedas ho il cussagl cumünel traunter oter tratto e decis sur dal seguaint:
Provedimaint da sandet Engiadin‘Ota
Il cussagl cumünel da Zuoz metta la radunanza cumünela a reguard il futur dal provedimaint da sandet sün marculdi ils 4 marz 2026. La documainta e las infurmaziuns da fuonz per las votaziuns sur dal futur dal provedimaint da sandet Engiadin’Ota staun a disposiziun al cussagl cumünel in fuorma finela daspö mited schner 2026. Per pudair preschanter a las votantas ed ils votants da Zuoz üna proposta elavureda minuzchusamaing e bain fundeda, as stu il cussagl cumünel piglier avuonda temp per examiner a fuonz la basa da decisiun. In occasiun da sia tschanteda dals 21 schner 2026, ho il cussagl cumünel dunque decis, da spuster la radunanza cumünela planiseda in quist connex dals 4 favrer süls 4 marz 2026. Siand cha la votaziun a San Murezzan ho lö ils 8 marz 2026, resta avuonda temp per fer ils sclarimaints necessaris e per promouver üna discussiun politica.
Provedimaint d’ova illa Plaiv
Il cussagl cumünel da Zuoz ho decis l’intent da perseguiter ün proget a reguard il provedimaint d’ova insembel cullas vschinaunchas da Madulain e La Punt Chamues-ch. Il proget prevezza traunter oter dad inchascher l’ova d’Es-cha per ova d’adöver. Da ragiundscher üna redundanza traunter las vschinaunchas es ün böt. Da sgürer l’innaivamaint in cun separer ova potabla dad ova dad adöver es per Zuoz ün ulteriur böt chi’s pudess ragiundscher uschè. Il prossem pass in chosa es la furmaziun dad üna gruppa da lavur cun rapreschantantas e rapreschantants da las trais vschinaunchas.
Fermativas da bus
Per adatter las fermativas da bus a la Staziun e tar la Via S-charlattina a la ledscha federela davart l’eleminaziun dals dischavantags invers persunas cun impedimaints ho il cussagl cumünel incumbenzo ün stüdi. Quist dess evaluer il manaschi dal trafic public cullas fermativas da bus culs nouvs uraris da tren e bus chi vaun in vigur zieva la realisaziun da la nouva staziun. Las fermativas dessan spordscher access e sgürezza düraunt tuot las stagiuns ad ütilisedras ed ütiliseders dal trafic public.
Clucher San Luzi
In ün proget cumplessiv ho la vschinauncha da Zuoz evaluo e scholt cun imsüras la problematica da la statica dal clucher e da tonalited dals sains sül clucher San Luzi. Insembel culla ditta Muff Kirchturmtechnik AG as ho sviluppo ün nouv sistem cun cunter perpendiculs. La nouva installaziun lascha darcho suner tuot ils quatter sains in differentas sunarias. L’indriz vain inauguro in sanda ils 7 favrer 2026 (Annunzcha tar l’administraziun cumünela).
Scoulina – Adattamaint da la spüerta
In basa a las cifras da scolaras e scolars in scoulina, decida il cussagl cumünel sün proposta dal cussagl da scoula da spordscher a partir da l’an da scoula 2026/27 üna gruppa cumbineda illa scoulina Zuoz/Madulain. Quist ho in consequenza, cha pü pochs pertschients dad impieghi sun necessaris. Furtünedamaing es que pussibel sur üna fluctuaziun natürela e la vschinauncha da Zuoz nun ho da desdir üngünas plazzas da lavur.
Dumanda da sustegn – fundaziun promoziun per furmaziun professiunela
Il cussagl cumünel decida da sustgnair las activiteds da la fundaziun promoziun per furmaziun professiunela eir düraunt l’an 2026. Las activiteds haun il böt dad accumpagner giuvenilas e giuvenils sün lur via illa vita professiunela e da sustgnair instituziuns chi spordschan plazzas da giarsunedi. Il cussagl cumünel arcugnuoscha l’importanza da quista spüerta.
Silvia Neves nouva collavuratura custodia
Zieva la desditta da duonna Maria Olinda Melo Rosario Monteiro, es la plazza gnida scritta oura cun ün pensum da 50 fin 60%. Il cussagl cumünel tscherna a duonna Silvia Neves scu successura a partir dals 1. schner 2026 cun ün pensum da 50 fin 60%.
Sponsoring e promoziun da talents
Il cussagl cumünel decida da sustgnair finanzielmaing las seguaintas atletas ed atlets cun ün sponsoring u i’l ram dal concept da promoziun da talents
- Gian Andri Bolinger: ski freestyle, squedra naziunela Swiss Ski
- Nicola Bolinger: ski freestyle, squedra naziunela Swiss Ski
- Anina Casty: ski alpin, cader perspectiv chantunel
- Corsin Pinchera, biathlon, center da prestaziun da sport regiunel
- Livio Derungs, ski freestyle, center da prestaziun da sport regiunel
- Armando Steger, ski freestyle, center da prestaziun da sport regiunel
- Franco Steger, golf, cader naziunel giuvenils Swiss Golf
Mille Miglia 2026 – Coppa delle Alpi
In Marz 2026 visitescha l’evenimaint cun veiculs „Oltimer“ l’Engiadin’Ota cun partenza e böt a San Murezzan. Ils tragets passan eir a Zuoz e cumpetiziuns haun lö süls tragets traunter Zuoz e Madulain e Zuoz e S-chanf sülla veglia via chantunela. Las cumpetiziuns nu sun sün temp, dimpersè sün precisiun. Ils tragets haun da gnir serros, causa cha’ls veiculs vaun cun üna sveltezza bassa. Seguaintas serredas da via sun permiss dal cussagl cumünel:
- Gövgia, 12 marz 2026, Via veglia Madulain–Zuoz, 15:15 fin 19:30h
- Venderdi, 13 marz 2026, Via veglia S-chanf–Zuoz, 15:00 fin 18:30h
- Sanda, 14 marz 2026, Via veglia S-chanf–Zuoz, 15:00 fin 19:00h
Tschernas da Chalandamarz 2026
A las tradiziunelas tschernas da Chalandamarz ils 1. marz 2026 sun seguaintas caricas in tscherna:
- Cussagl cumünel: 2 sezs
- Cumischiun sindicatoria: 1 sez
- Cumischiun da fabrica: 1 sez
- Cussagl da scoula: 1 sez
Candidatas e candidats per las caricas in tscherna paun gnir numnedas a la radunanza cumünela dals 11 favrer 2026 u in scrit a l’administraziun cumünela fin venderdi ils 13 favrer 2026