Üna decleranza d'amur

Üna da mias paschiuns es da spassegiar cul cabrio tras l’Engiadina. E minchatant dürant las vacanzas eir da far viadis plü lungs per visitar ils pajais vaschins ... «Ma che til vain be adimmaint», pensaran uossa fingià ils prüms. «Che banausa ecologica, in quists temps dominats dal müdamaint dal clima», blastemaran ils oters. Co ma as poja be viagiar cun ün cabrio pel muond aint, sainza böt e sainza respet ecologic? Eu dun prò: In quist reguard es meis agir tuot oter co net. Natüralmaing n’haja noscha conscienza ed eu dumond sinceramaing per pardun. Quai nu dess uossa esser üna s-chüsa, ma eu conferm quatras, cha per la paja svouli fich pac pel muond intuorn. Eu sun svolà ils ultims 15 ons be üna jada a Miami a visitar a mia sour e darcheu inavo. Be d’incuort n’haja let cha passa 600'000 persunas l’on svoulan da Genevra a Turich e viceversa. Üna stricha chi’d es predestinada pel viadi cul tren. I fa eir impreschiun a verer per exaimpel sün flightradar24.com quants aviuns chi sun actualmaing in viadi. Tuot quels svoulan cun o sainza mai. Quels svoulan simplamaing, schi sun occupats bain o brich. E lura che less eu fingià cun meis pitschen cabriolet cotschen? (Vairamaing nun e’l gnanca meis, dimpersè da mia duonna.) Sül muond daja delicts ecologics amo bler plü gronds. Però quai es ün pensar sbaglià. Eu sa. Minchün as sto tour finalmaing svess pel nas. Ma in quist blog nu vaja per pavlar mia noscha conscienza. Vairmaing vulaivi tematisar tuot qualchos’oter. Laschain perquai ün mumaint da la vart il müdamaint dal clima ed invlidain üna pezza l’aspet ecologic. Viagiar cul cabrio in Engiadina fa simplamaing plaschair. Sainza tet as vezza bler plü bain la cuntrada unica. Mincha udurin da fluors e d’erba secha – simplamaing da la natüra – riva directamaing i’l nas. Dafatta la savur da grascha ed aldüm es natala. La natüra cun tuot sias bellezzas es bler plü dastrusch. Uossa gnaran ils «ruinatuot» (Spielverderber) darcheu a pled: «Che sen fa ün cabrio in Engiadina, ingio cha l'inviern düra nouv mais?» Paperlapà! Id es bler plü bel da viagiar illas muntognas cul cabrio sur munts e vals, co da cuorrir illas citats d'ampla ad ampla. E güst in da quels dis sco dumengia passada, ingio cha’l tschel blovischem survaglia sco üna culla la patria, paran tuot ils pissers d’esser lontans. Chavalgiond la via d’Engiadina s’haja l’impreschiun d’esser i’l paradis. Cun bocca averta as poja admirar ils lös ingio cha’ls razs da sulai toccan la terra. Che privilegi da giodair quists mumaints unics cun üna persuna amada e da laschar per ün mumaint il muond chi tuna. Eu sun vairamaing Jauer, sun creschü sü a Zernez, n’ha lavurà differents ons a Samedan e San Murezzan e viv daspö passa 20 ons giosom l’Engiadina Bassa. Eu sun Engiadinais tras e tras. D’esser schurnalist e redacter in patria es sco da viagiar cul cabrio. Che privilegi da passantar il di in Engiadina cun ögls averts e da rapportar da tuot quai chi capita a schnestra ed a dretta in mia patria. Ed eir cur chi spüzza ün païn esa d’esser preschaint e sclerir ils fats. Eu das-ch esser preschaint dapertuot: cur cha Nevin Galmarini e Dario Cologna tuornan cun lur medaglias d’or dals gös olimpics, cur cha la Lia Rumantscha festagia l’anniversari da 100 ons in preschentscha dal cusglier federal Ignazio Cassis, cur cha’ls chavals cuorran sur il lai da San Murezzan, cur cha Not Vital suottascriva il contrat da cumprita dal Chastè da Tarasp e cur cha’l prinzi Albert da Monaco va culs skis in Samignun. (Quai d’eira dal rest üna da las prümas incumbenzas sco redacter da la Posta Ladina avant var dudesch ons.) Ils plü captivants sun però ils inscunters culs Engiadinais, dal plü giuven fin pro’l plü vegl. Las istorgias cha’ls indigens quintan – quels chi nu sun sül palc e stan aint il center – van fermamaing a cour e svaglian emoziuns. Quellas istorgias sun pel solit scrittas dal destin e fan grond’impreschiun. Che bels mumaints. Quels inscunters fan adüna grond plaschair e suottastrichan la persvasiun da far il güst manster. D’esser schurnalist es vairamaing bler daplü co üna vocaziun. Quai es üna paschiun, üna filosofia da vita. Vairamaing füssa bod da pajar qualchosa pel privilegi da pudair lavurar là, ingio cha oters fan vacanzas ... Ingün schurnalist paschiunà nu po dir davo ot uras in büro cha sia lavur es a fin. Ils blers arrandschamaints captivants capitan la saira e la fin d’eivna. E scha’l muond va suot dürant la not, esa da rapportar eir sur da quel. Schurnalist s’esa 24 uras al di. Ed eu n’ha il plü bel manster illa plü bella regiun chi da! Quai n’haja provà da declerar quista prümavaira eir als uffants da scoulina a Ftan. Davo pacs pleds da mia preschantaziun paschiunada, dumonda ün mattet: «Cura pudaina darcheu giovar ...?» A quist mattet da scoulina nu suna stat bun da persvader. Perquai sperescha ferm, cha mia decleranza d’amur per meis manster e mia patria haja chattà daplü interess pro’ls lectuors dal blog. Ma a la fin stögl eu esser persvas da quai ch’eu fetsch. E scha qualchosa vain fat cun ingaschamaint e paschiun, schi vain quai eir onurà cun reacziuns positivas. Autur: Nicolo Bass, schefredacter suppl. EP/PL
  fjadöfad fjaödjfö adkjföad