Ils uffants da Schombrina

Eu sun creschü sü i’l cumün vegl da Scuol, nempe giò Scuol sot. Nossa chasa ha quatter abitaziuns e portas chasa. Üna da quistas portas guarda vers la via da Dualatsch, tschella, chi gniva dovrada be da nona e bazegner, es drizzada vers Schombrina Sura. 

Cun sia salaschada cotschnainta quadrata, chi rinforzaiva ils clings da las s-charpas dals abitants, sias giassinas aval ed amunt e cun chasas engiadinaisas, las plü scharmantas da Scuol, d’eira Schombrina fingià adüna statta üna via tuottafat speciala e plain vita. Plain vita d’eir’la impustüt eir pervi da las schurmas d’uffants chi s’inscuntraivan saira per saira sün via per giovar in cumpagnia. Cun meis duos frarins am partecipaiva eir eu suvent a quistas sairadas. «No giain oura», vaiva lura adüna nom. «Ma per sain da not eschat a chasa!», la resposta da nossa mamma.

Insembel cun mias amias e meis amis dals quartiers, las vias da Craista, Ruanditsch e Panaglia ans chattaivan nus uschè mincha saira our in via per giovar a zoppar, trais passins o capitola. Per part gnivan dafatta ils uffants da Scuol sura giò pro nus, uschè cha nus d’eiran daplü co avuonda uffants per giovar a «lader e bulla». Meis gö predilet d’eira variamaing tuot ün simpel: capitola. Il böt da quist gö d’eira da’s zoppar da quel chi dombraiva, cul böt da büttar per terra ün toc lain intant cha’l dombrader giaiv’in tschercha dals giovaders zoppats. Schombrina spordschaiva üna pruna buns lös per as zoppar: giassinas tanter las chasas e dafatta ün tet d’üna chasa chi d’eira da quel temp in muschna, ma chi’d es i’l fratemp gnüda renovada. Daplüs zops nu lessa uossa tradir, pel cas cha la prosma generaziun d’uffants da Schombrina vess da leger üna jada quist text.

Daspö quistas sairas sun passats blers ons ed amo bler daplü aua es passada giò per l’En. Intant abitain nus ill’abitaziun culla porta chasa vers Schombrina. La salaschada cotschna decorescha amo adüna las chasas a dretta ed a schnestra. Ma daspö divers ons nu s’haja plü dudi als uffants a giovar las sairas sülla via stretta. Che saraja be capità? Chi sa, scha’ls uffants da Scuol sot sun its tuot quists ons forsa sü Scuol sura a giovar? Han noss vaschins forsa reclomà chi saja stat massa dadot? O giovan ils uffants d’hozindi plütöst cun lur playstation o sur lur telefonins ün cun tschel?

E nus? Che esa capità culs uffants originals da Schmobrina? Bleras vias da nus uffants s’han spartidas. Ma il contact es bainschi amo avantman. Be la località s’ha müdada. Quai chi d’eira da plü bod Schombrina, sun uossa differents lös in ed our’d cumün. Quai chi d’eira giovar a capitola, es uossa il passantar sairadas pro ün o pro tschel a chasa obain in sortida. Quai chi’d es restà tuot quists ons es pero l’oblig da’ns inscuntrar regularmaing per passantar ün bel temp insembel – sainza stuvair tadlar al sain da not.