Bainvgnüda a la Babania!

Quai d'eiran amo temps, cur cha la glieud staiva tuornar in lur lö da naschentscha per la dombraziun dal pövel e cur cha'ls Trais Rais Chasper, Melcher e Baltisar pudaivan viagiar sainza masüras e restricziuns tras il pajais. Els nun han neir stuvü muossar certificats per visitar l'uffantin nouvnaschü in seis parsepan ed els nun han stuvü portar mascrinas tanter tuot ils pasters e las differentas bes-chas. Els as pudaivan mouver sainza reglas ed impedimaints. Hozindi regna ün'otra situaziun pels rais actuals, per exaimpel per Roger, Novak e Rafael! Al rai Novak han ils Australians spedi darcheu a chasa, causa ch'el laiva gnir trattà oter co'l pövalet normal. Inguotta cun regalins e sacrifizis per mantgnair la buna glüna. E scha qualchün da quistas medias mundialas be ris-cha da muossar il daint, schi badan els il vent dal bap dal rai e Dieu da la rabgia Srdjan... In quist reguard es nos muond rumantsch amo plü simpel e quiet. Eir ils Dieus ladins dozzan minchatant la vusch, però vairamaing ans das-chaina permetter bod tuot. Anzi, las discussiuns rumantschas s'insabluneschan bainsvelt, pel mumaint as tschercha in dumondas linguisticas plütost la pasch in terra rumantscha. Hoz nun es be il di dals Trais Raiso precis ün on davo cha'l Capitol in America es gnü attachà dals Trumpanersils 6 schner es eir l'anniversari da La Quotidiana. Avant precis 25 ons es la prüma gazetta rumantscha dal di cumparüda la prüma vouta. La prüma Posta Ladina rumantscha es cumparüda magari precis ün mais avant la gazetta quotidiana. La Engadiner Post/Posta Ladina ha festagià quist giubileum l'on passà quiet e dezaint, sainza grond travasch. In tuot 25 persunas han scrit üna columna d'anniversari pel giubileum da 25 ons e quellas sun gnüdas publichadas dürant tuot on. Ils gratulants nun han be lodà la giubilara d'impersè eir fat propostas pel svilup futur. Eir la redacziun da la EP/PL as fa regularmaing impissamaints a reguard il svilup da la gazetta bilingua. D'eira la lingua rumantscha lönch limitada impustüt sün las duos paginas da la Posta Ladina, as chatta quella hoz derasada in tuot la gazetta. Tuot las lecturas ed ils lecturs vegnan, sfögliond la gazetta, dapertuot in contact culla lingua rumantscha. Da quai profitan ils lecturs tudais-chs e rumantschs. Ed a partir dad hoz dess eir il Blog da la EP/PL esser biling. Quist es nempe il prüm blog sün blog.engadin.online chi vain publichà in rumantsch! Eir scha'ls bloggers d'eiran fin uossa per part fingià rumantschs, sun tuot las contribuziuns fin uossa gnüdas publichadas in tudais-ch. Perche vairamaing? Quai nu sà ingün da dir, quai d'eira simplamaing uschè(?) Ma uossa as müda eir quai, uschè sco cha tuot il muond as müda. In quel sen, bainvgnüda chara lingua rumantscha al di da Babania eir sün blog.engadin.online! E sperain cha Tü chattast Tia rolla tanter ils bloggers ed at fast valair cun tia melodia amabla. Tü das-chast minchatant eir cloccar sün maisa, uschè cha tuot ils rais at saintan. Però in mincha cas dessast in avegnir eir avair daplü cuntgnü, sco quai cha'l prüm blog rumantsch ha gnü. Sperain almain ;-) Nicolo Bass, schefredacter-suppl. EP/PL PS: Forsa n'haja eir exagerà üna païn: Il prüm dals prüms blogs rumantschs ha nempe scrit ün practicant da la EP/PL als 31 avuost 2020, nempe Jan Schlatter da Scuol sur dals uffants da Schombrina. Perquai esa da laschar ad el las urbajas (grazcha Jan per render attent).