Il X dal Y

Cumanzà ha quai fingià avant decennis, cur chi m’han vis ad accumpagnar mias chanzuns da chantautur na be culla guitarra, ma a listess temp eir cun ün orgelin da bocca o co chi’s disch eir «culla gaita». E bel e fat e sainza vulair sun eu dvantà il «Bob Dylan da l’Engiadina». Üna stigmatisaziun per meis avis ün zich cumadaivla e perfin saimpletta. Ün cumplimaint? Na. Pervi ch’eu nu laiva mai copchar al songwriter american Robert Allen Zimmermann, il vair nom dal poet genial, el chi’d es eir fingià stat nomnà il «Shakespeare dal rock». Eu craj ch’el vess gnü tant pac dalet, tant sco eu vi da meis titel.

Directamaing giò da tschêl nun es crodà amo ingün, e sco ch’eu n’ha imprais üna pruna da Dylan, dals chantauturs talians sco Fabrizio de André e Francesco Guccini, da las chanzuns popularas rumantschas e lombardas (Nanni Svampa) d’eira eir Dylan stat inspirà dad oters folksingers, dal blues dals Afroamericans ed oter plü, Chuck Berry, Elvis Presley e.u.i. Sco schi nu’s das-chess esser o crear alch sainz’esser l’epigon d’ün’otra persuna o d’ün’otra chosa.

Ma train inavant l’istorgia per render plü cler l’absurdità: L’En – il Rain da l’Engiadina. Il plaininpigna – il rösti da Valsot. Livio Foffa – il Beni Thurnherr da Radiotelevi¬siun Svizra Rumantscha. ¬Elmar Deflorin – il Mick Jagger da la Surselva. Bruno Cathomas – il George Clooney da Laax.

Las uzuas – la vigna dals povers. Il luf – il Gozilla dals Vallesans. Il Piz Bernina – il Monte Rosa dals Sankt Moritzers. Exaimpels as laschessan inventar a l’infinit, cun ün zich fantasia. Ün zich damassa noscha fantasia füss quai però da dir: Alain B. – l’Albert Schweitzer dals Schweizers. Obain: Magdalena M. BI. – la Iron Lady o perfin la BB dals Zürchers. Ecetera…
Ma sco dit: il X dal Y. Fat bön e pigliai las robas per las talas chi sun. La columna rumantscha da la FMR ha scrit quista jada Paulin Nuotclà.