Sco ün nosch sömmi

Eu viv daspö 50 ons cun üna manzögna! Quai es da na crajer, pür hoz m’es quai propcha gnü consciaint. Ma cumanzaina da prüma: Sper la musica instrumentala es il gö da tschoccas mia gronda paschiun! Fingià meis genituors giovaivan plü bod a tschoccas a Zernez. A la fin dals ons 1970 han els dafatta organisà üna maestranza svizra a Zernez. Displaschaivelmaing nun han els muossà a mai d’uffant quist gö fascinant. Eu n’ha gnü in man pür in schner 1999 la prüma jada üna tschocca sül glatsch a Strada. Quella jada vaivan cumprà üna vainchina da persunas nouvas tschoccas per far la saira ün’actività da cumpagnia. Meis bap muribund es gnü quella jada our dal let a l’ospidal a Scuol, per muossar co cha stögl star nan inandret per trar la tschocca. In quist mumaint n’haja surgni sia paschiun pel sport da tschoccas. Pacs dis plü tard ha el pers seis ultim gö cunter la malatia maglina.

Daspö quella jada m’ingasch eu pel gö da tschoccas in Engiadina Bassa, in Grischun ed in tuot la Svizra. Ed eu n’ha provà da dar inavant mia paschiun eir a meis figl. D’incourt es el gnü repetidamaing champiun svizzer da tschoccas dals juniors. Seis bazegner vess ün grond dalet da quist success.

Ed uossa la gronda sfüfla: il gö da tschoccas nun exista – almain in rumantsch ladin! La traducziun ufficiala da Tscharner es nempe per «Eisstockschiessen»: trar a rudellas (verer l’Imprender rumantsch illa EP/PL da sonda, ils 11 favrer). Il pled «tschocca» es inexistent. Quai es sco ün nosch sömmi. I’m vain tut il fuond suot ils peis; tuot mia paschiun e meis ingaschamaint dals ultims ons as vapurisescha, sco scha vess vivü tuot mia vita cun üna patüfla. Eu speresch ferm, cha la cumischiun da lingua rumantscha accepta ün tschert dret d’üsanza e lascha viver in avegnir il gö da tschoccas in territori ladin.

Columna: Nicolo Bass