Scrits sainza fin

 Cler, ils uraris, chi d’eiran gnieus fats accuratamaing vegnan miss sül cho da tuot las occurrenzas extraordinarias chi stöglian auncha gnir realisedas aunz las vacanzas. Vers la fin, que es eir cler, nun haun ni scolarins ni magistraglia pü uschè bger schlauntsch da dir sü amulains ed alfabets u perfin auncha da scriver e correger prouvas. 

A s’inclegia dimena da se, cha que es il temp adatto per fer excursiuns, il di da sport, il viedi da scoula, schi vo bain auncha la visita impromissa illa halla da rampcher u i’l bagn liber. Na da schmancher l’examen da velo e la visita da la tanta dals daints. Üna pruna puncts da program dimena, chi drouvan comunicaziun supplementera ed eir agüd dad ün u l’oter dals genituors. 

Sün da tuottas sorts palperis faun ils magisters alura a savair che, inua e cu. Na cha’ls scolars gnissan al di da sport sainza lur tenüs da gimnastica u schmanchessan perfin la marenda per fer il viedi da scoula. Infurmaziuns bain nüzzaivlas pels genituors. Uschè rivan già circa trais fin quatter eivnas aunz las vacanzas da sted las infurmaziuns in scrit, pel solit sün palperi A4 – a temp pels genituors per pudair reagir e fer cumischiuns; minchataunt sün palperis A5 – già ün po pü a cuorta vista e forsa eir auncha cun ün sbaglin da data u dal temp. Ma eau m’impais alura adüna, que po capiter ed a faregian alura bain a savair aunch’üna vouta pü precis a cuorta vista. E baincumel, quellas infurmaziuns, chi vegnan l’ultim mumaint u chi velan scu correcturas dad ün’anteriura notizcha, rivan alura sün uschè pitschens scrittins, maximelmaing duos fin trais centimeters largs.

Gugent stampan ils magisters quellas infurmaziuns eir sün palperi da culur, forsa per cumpenser la grandezza dal scrittin, pensand cha’ls genituors als vezzan alura meglder. In mincha cas quists scrittins, schi rivan insomma our da las chafuollezzas da las buschas dals iffaunts, alura vaune, almain tar me, fich svelt a perder. Già chi sun uschè pitschens chi’s craja chi saja be ün palperi da caramellas. Ed uschè es que eir già capito ch’eau d’he schmancho da trametter ils iffaunts cul velo a scoula u dafatta ch’eau nu d’he fat las cumischiuns per las marendas – ed uschè stuvieu improviser a la svelta ün pic-nic pel viedi da scoula.

E per quelo suni steda insè absolutamaing cuntainta, cur ch’eau sun gnida a savair, cha la scoula müda sia comunicaziun in ün’app electronica, bel ed a posta per scoulas (Escola/Klapp). 

Juhui, üngüns scrittins pü, d’he eau penso. Be per constater alura cha’l problem nun es nimia scholt uscheja. Uossa paun nempe ils magisters e las magistras eir auncha lascher gnir adimmaint la saira las nouv, cha giajan il prossem di güsta sur mezdi i’l bagn liber e cha’ls iffaunts dessan piglier cun se marenda ed üna liangia da brasser. 

Autura: Olivia Portmann-Mosca/FMR
La FMR (Fundaziun Medias Rumantschas) furnischa cuntegns medials scrits (per exaimpel texts e graficas) e fotografias per mans da las medias rumantschas. Ella scriva seis artichels in tuot ils tschinch idioms ed in rumantsch grischun. La FMR incumbenzescha eir a persunas rumantschas dastrusch e lontan da scriver columnas sur da quai chi tils occupa illa vita da minchadi.