Partenza gniervusa

Che eleganza! Edy, il skiunz gigant da lain da pin ho gieu her saira finelmaing sia granda cumparsa. El es sto part silenziusa da la festa d'avertüra i'l parc dal Kulm, in sieu dachesa temporar. Üna festa dalönch innò brameda e - cun arduond 5000 spectatuors - eir bain reuschida. Adonta d'üna partenza püchöntsch gniervusa e diversas dumandas aviertas. Ma ün zieva l'oter: La deposiziun «partenza gniervusa» es tuottafat persunela e nun ho da chefer zist segn culla festa d'avertüra manzuneda, ma taunt dapü cun mieus prüms pass dad avicinaziun als champiunedis mundiels da skis a San Murezzan in quists dis. Que ho cumanzo dumengia zievamezdi, examinand causa lavur la spüerta extaisa dal trafic public in Engiadin'Ota. Dimena, eir eau sun resto perplex, cur cha'l tren s'ho fermo a Schlarigna e la duonna misteriusa da la Viafier retica - vus savais, quella chi'ns trategna düraunt tuot l'an cun sia buna glüna in tudas-ch, inglais e minchataunt eir in rumauntsch - ho dit tuot seri qualchosa scu: «Welcome to St. Moritz… and enjoy the alpine ski championships». In seguit ho ella giavüscho «a tuot ils passagers da sortir dal tren…». Vus vessas stuvieu vzair quellas ögliedas stuttas da diversas persunas i'l vagun, lur muvimaints hectics per ramasser svelt tas-chas, chapütschas e guaunts… E pür lur fatschas grittas our sül perrun cur cha'l tren s'ho miss darcho in muvimaint vers San Murezzan! Bain, eau admet, l'ultima frasa d'eira be ün'invenziun, üna per der ün pô paiver a l'istorgia. Natürelmaing vains nus indigens, chi d'eirans aint il tren, pudieu persvader als giasts da rester calm e da’s fider auncha ün pêr minuts al servezzan public. Main incletta d'heja invezza gieu cun turner la saira darcho vers l'Engiadina Bassa. Quel tren es partieu a San Murezzan cun passa üna quart d‘ura retard tenor urari - e que zieva ch'eau vaiva già spetto s-chars ün'ura il tren - pervi ch'eau vaiva lascho passer l'ultim per duos pluffers minuts. Il scopo dal retard es sto ün simpel vagun-restorant chi ho stuvieu auncha gnir attacho al tren. Cuffortant, nischi? Laschè am turner a las dumandas aviertas. Quella la pü divertenta da la saireda - s-chüsa Nicole - d'heja udieu düraunt la festa d'avertüra, cur cha'l moderatur ho preschanto la chantadura da l'imna naziunela: «Nicole Bernegger!» Dalum d'heja udieu intuorn me a quatter u tschinch persunas chi s'haun dumandedas, quasi sün cumand: «Wer isch d'Nicole Bernegger?» Quist blog nu fess sen, sch'el nu vess pront la resposta: üna chantadura da Soul svizra chi ho guadagno dal 2013 la concurrenza da chaunt «The Voice of Switzerland», adonta ch'ella nu d'eira bella giuvna, ma bella in spraunza quella vouta, e già benedida d'üna grandiusa vusch. Cuffortant, nischi? Hoz vegnan lantschos ils champiunedis eir sül champ sportiv e que cul Super G da las duonnas. La Lia Rumantscha es preschainta a las 16.00 ed a las 17.00 illa zona da peduns, a las 19.00 chaunta lo il „Oberengadiner Jodelchörli“ e pü tard, a las 20.00, concerteschan ils «77 Bombay Street» i'l parc dal Kulm.