La mega-fin d'eivna

Che sfida! Da la fin d'eivna passeda vaivan tuots ün pôin chila a San Murezzan. Eir, scha que nu vulaiva natürelmaing üngün admetter aviertamaing. A la fin finela as porta cò sül tschop il label «Top of the World» ed il sulagl i'l cour e que cun superbgia. Ma divers, grands evenimaints sportivs ed importantas decisiuns politicas haun tgnieu sü ot il puls e chaschuno cò e lo ün sön liger. Forsa cha eir la glüna plaina da gövgia passeda ho auncha güdo tiers e tgnieu sdasdo a quels, chi zieva ün'eivna da champiunedis, zieva lungs dis e cuortas nots, füssan stos cots da sön.    Ma, ad es uossa eir a San Murezzan mited favrer e dimena stagiun ota – Highlife cun tuot que chi tuocha tiers. Grazcha als champiunedis mundiels da skis es preschainta üna massa da  glieud. Insomma dapü cu’l solit. Sül champ sportiv haun gieu lö las duos cuorsas rojelas dals champiunedis mundiels da skis, il derby da hockey engiadinais ed eir la prüma dumengia da las cuorsas da chavals White Turf sül lej inglatscho. Tuot i'l radius da pochs tschient meters e, tuot infra pochas uras. Duos dis stedi d'urgenza! 222 spectatuors haun vis in sanda saira, scu cha l'osp, il EHC San Murezzan ho decis illa prolungiaziun il derby cunter il Club da hockey Engiadina. Arduond 9000 persunas as haun radunedas intuorn l'oval da cuorsa sül lej ed incurascho ils quadrupeds cun lur jockeys süllas arains. E dafatta fin 40'000 persunas haun visito las duos cuorsas aval chi haun gieu lö her dumengia üna zieva l'otra. In sanda, chera glieud, es nempe capito que, cha’s pudess circumscriver cul pled inter rumauntsch «Worst Case». Sgür our da vista dals organisatuors e forsa eir our da vista da quels tschients u millis da spassagiunz chi d'eiran bloccos sülla senda da Uorsin, be pochs tschient meters suot l'entreda e suot las tribünas a Salastrains. Sgüra ch'els haun vis sü, spettand in culuonna, quella maledetta nüvla gigantesca sü sur la pista. Per üna vouta na la misteriusa «serp da Malögia», ma la parainta, spessa vetta anonima da tschiera, chi s'ho missa imprudaintamaing sur la pista da skis ed impedieu uschè la partenza da quella. Invezza da scriver cò da «Worst Case» as pudess guarder però tuot que eir in sen positiv e scriver las seguaintas lingias grassas: «Record mundiel! 40'000 as radunan a Salastrains per fer cumünaivelmaing marenda.» Ün evenimaint cha'ls turistikers stuvessan svilupper inavaunt, par exaimpel il sen d'üna «Tavolata d'inviern» opür d'üna «Stramangeda» extaisa. Hoz lündeschdi es planiseda la cumbinaziun alpina dals homens. Illa zona da peduns suna a las 17.00 ed a las 19.00 la band Tawnee, cun rischs grischunas e cuntschainta, pustüt, per lur hit «Jamie» dal 2013.