Glivro, cun ün ögl blov

Che finischun! Ils 44evels champiunedis mundiels da skis a San Murezzan sun daspö her istorgia. Duos eivnas da cumbat sportiv süllas pistas traunter Corviglia e Salastrains, duos eivnas da cumbat per millievels da secundas, duos eivnas dad assedi da medias e fans dal sport da skis, duos eivnas però eir da stedi d'urgenza a reguard il trafic a San Murezzan. 65 milliuns francs per duos eivnas evenimaint e l'onur, d'esser sto preschaint in quel temp illa vaidrina mundiela. E, pel nair d'ün‘ungla vess tuot pudieu esser sto invaun, tuot las fadias pel giat, tuot l'onur pel diavel. Alura nempe, scha quel accidaint d'ün dals aviuns PC 7 da l'armeda svizra nu vess desdrüt be üna camera da televisiun, dimpersè chaschuno ün greiv accidaint cun dans e victimas. Alura füss sto ruino tuot in d'ün batterdögl. Incredibel perque, cha organisatuors da festas scu'ls champiunedis mundiels da skis haun da ris-cher taunt cun da quists acts prepotents. Disgrazchas düraunt demonstraziuns aviaticas haun musso già diversas voutas, quaunt invaun cha similas acziuns sun. San Murezzan es gnieu liber bunmarcho, cun ün ögl blov per uschè dir. E be grazcha a que restaro in algordanza il success dals champiunedis mundiels da skis – taunt our da vista organisatorica scu eir our da vista sportiva. Ad es sto üna grand-bella festa paschaivla da las naziuns! Che cha'ls champiunedis 2017 haun purto suot il strich turisticamaing, economicamaing e socielmaing a la vschinauncha da San Murezzan ed a la regiun, que mussaron pür ils prossems ans. A vo almain pella reputaziun, il gro da renomina, l'onur ed eir per rester i'l ravuogl da las destinaziuns da sport d'inviern, chi sun ablas dad insomma organiser tels arrandschamaints grands. Fin alura saro schmancho eir l'accidaint militer, la camera da televisiun rimplazzeda ed il respunsabel da l'accidaint – chi so – forsa gnieu tramiss in Austria. Taunt per fer schnöss ün‘ultima vouta. Schi, ils Austriacs, quels chi’s haun tgnieus inavous prudaintamaing al cumanzamaint dals champiunedis e fat crajer da maniera tuot maligna als  Svizzers, ch'els, ils Össis, surlascharon quist an straglüsch ed onur als osps. Sbaglio, ma da grand! Precis a partir da quel mumaint, cha s'ho proibieu als Tirolais da fer grand festa sülla plazza da la scoula veglia, da quel mumaint haun eir ils Austriacs reagieu spermalos e s‘haun dits: Bain, scha vus nun ans cuis nossa festa, alura tramettains nus a la partenza da las ultimas cuorsas noss meglders skiunzs. E che es capito? Intaunt cha'l «Tiefflieger» svizzer ho tschunch il fil da la camera, sun ils Austriacs partieus per lur svoul in ot ed haun guadagno in seguit medaglia per medaglia. E scu cha que nu vess bastieu, haun els guadagno a la fin finela eir auncha il spievel da las medaglias aunz la Svizra. Che blamascha pels alv-cotschens, quels culla crusch! Dimena, che pudains nus imprender da quist'istorgia? Tgnair aint l'otezza güsta da svoul, e mê ruiner üna festa tirolaisa. «Ecco fatta, la barb'al gatto», dian ils Puschlavins in telas occasiuns. Hoz lündeschdi es nempe il prüm di zieva ils champiunedis mundiels da skis 2017 a San Murezzan. Als fans da skis pudains nus fer spraunza cun dir: Sü cul cho, a düra be auncha 715 dis fin tals prossems champiunedis mundiels da skis 2019 ad Åre in Svezia e be auncha 1447 dis fin tar quels da Cortina d'Ampezzo in Italia. In quel sen: a bun ans vair.