Ün dret mat svizzer ha adüna ün curtè in gialoffa. Quai n’haja dudi bleras jadas sco mattet. Impustüt al di dal Nicolaus gniva trat adimmaint dals amis a scoula, da pensar vi dal curtè da gialoffa. Scha’l hom barbus vess propcha da tour ün aint i’l sach, schi cul curtè as poja adüna far üna foura e mütschir. Perquai tocca il curtè pro’l di dal Nicolaus, tant co las manderinas e nuschinas...

Eu n’ha adüna tut a cour quai e perquai tocca ün curtè adüna pro meis «Sackbefehl» persunal – «Sackbefehl» gniva nomnà a militar il sachin in gialoffa cun robas indispensablas, per exaimpel ün «filaiht» (tenor Tscharner vain quai scrit uschè), ün cucun (nu sa amo hoz na perchè) ed ün curtè. Quel am salva adüna darcheu la vita, per exaimpel cun tirracucuns, svierchels, pincettas, fichadaints, e tuot quai chi tocca prò. I manca bod be il barschunin da daints.

«Tü nu pigliarast cun tai quist s-chierp in Canada?», m’ha dumandà mia nezza avant co partir d’incuort in vacanzas. «Ma baincler!», es statta mia resposta, «e quai ün bel cotschen culla crusch svizra». I nu’s sà nempe mai, schi vess da siglir oura ün uors davo ün bös-ch...

Quant superbi suna stat, da rivar cun meis curtè in gialoffa sainza problems tras tuot las controllas canadaisas.

Però quia meis cussagl our d’experienza: nu provarai da viagiar cun ün curtè da gialoffa sur il cunfin american o d’entrar in ün museum, per exaimpel i’l «9/11 Memorial» a New York! Quels nu chapischan cha quai es be ün pitschen, simpel «swiss tool». Trattà vainst sco ün delinquent. L’hom da la sgürezza d’eira bler plü grond ed amo plü larg co eu. 

Però eir eu n’ha finalmaing pudü tuornar a chasa. Ed eir meis bel curtè da gialoffa n’haja per finir dafatta surgni inavo. 

Columna: Nicolo Bass