«Pel mumaint es tuot in movimaint e nüglia nu sta salda», quinta la giuvna musicista Cinzia Regensburger da Scuol. El ha fini d’incuort seis stüdi da «Bachelor of Arts and Music» a Feldkirch ed uossa cumainz’la plain buonder e cun bleras ideas üna nouva part da sia vita. Fingià quista sonda part’la per l’America, ingio ch’ella realisescha ün proget musical cun chanzuns da George Gershwin insembel cul «Golden Gate Symphonie Orchestra» da San Francisco, chi vain dal rest dirigi dad Urs Leonhard Steiner chi viva dürant la stà a Scuol. L’on passà als prüms avuost, cuort davo l’ultima preschantaziun dal musical da Cinzia Regensburger a Scuol, s’han ils duos musicists imprais a cugnuoscher. E fingià il prüm discuors s’ha bainsvelt transmüdà in üna funtana d’ideas ed inspiraziun. Naschü landroura es il proget da la «Nouvavla Sinfonia da Bethoven» chi dess gnir preschantà l’on chi vain in gün suot la direcziun dad Urs Leonhard Steiner e Cinzia Regensburger illa halla Gurlaina a Scuol. Quist proget dess gnir realisà in collavuraziun cul «Golden Gate Symphonie Orchestra San Francisco», cun musicists ed ün cor ad hoc indigen e cun giuvens musicists e students da Dulwich College in Asia, chi’d es dal rest eir possessur da l’Institut Otalpin a Ftan. 

Chanzuns rumantschas cun orchester

Dürant seis prüm sogiuorn a San Francisco gnarà concretisà eir quist grond proget. «Na be quai», disch Cinzia Regensburger sün dumonda. Fingià la fin d’eivna da settember varà lö il prüm concert cun üna fuormaziun ollandaisa a San Francisco. «Eu n’ha arrandschà chanzuns rumantschas per orchester a Scuol, prosm’eivna ha lö üna prouva a San Francisco e lura es fingià il prüm concert», quint’la sco scha quai füss il plü simpel dal muond. E listess nu sa’la propcha che chi tilla spetta da tschella vart da l’ocean. «Eu m’allegr schnuaivel», disch la giuvna musicista da professiun ed agiundscha, «eu provarà da far mias experienzas e da profitar maximalmaing. Il plü ferm s’allegra ella dal proget da George Gershwin ch’ella po realisar sco solista al clavazin insembel cul «Golden Gate Symphonie Orchestra San Francisco» suot la direcziun dad Urs Leonhard Steiner. «Quai es ün grond sömmi da mai, da pudair sunar sco solista cun ün orchester». E scha quai capita eir amo in üna da las plü fascinantas citads dal muond, es il plaschair amo plü grond. Al principi da november varà lö la preschantaziun da la «Raphsody in Blue» da George Gershwin cun Cinzia Regensburger ed il «Golden Gate Symphonie Orchestra» a San Francisco. Sper las prouvas cul orchester in America, voul Cinzia Regensburger arrandschar melodias per orchester, scriver nouvas chanzuns, sunar e chantar in differentas bars americanas. E che amo? «Forsa imprender a ballar tango», respuond’la. 

Nouva chanzun «Chara nö cridar»

Tuot ils müdamaints actuals illa vita da Cinzia Regensburger, ha ella elavurà musicalmaing i’l album «in movimaint». Preschantadas vegnan üna tscherna da nouvas chanzuns rumantschas ed inglaisas cun melodias da Jazz, da Rock, da Tango e Big Band. «Tuot es different ed in movimaint – l’unic chi resta listess sun eu!» Quist album cumpara la fin da november respectivamaing al principi da december. Amo avant co partir per l’America preschaint’la quist venderdi la plü nouva chanzun «Chara nö cridar». Sco ch’ella declera, es quista chanzun üna critica umoristica a la società, chi dvainta adüna plü indolainta. «Minchün cugnuoscha a seis vaschin – e listess brich. Tuot es magari superficial», disch’la plain emoziuns da seis nouv tango d’amur. Ella lascha eir badair üna tscherta tristezza per quai chi’d es passà, pel bel temp dal stüdi a Feldkirch, ingio ch’ella vaiva creà ün lö da retratta creativ e prüvà. Però tuot va insacura a fin e minchün va sia via sainz’ambiziuns da vulair incleger tuot il muond. «Eu less simplamaing esser libra», sun ils ultims pleds da la chanzun. Libra, per far tuot quai chi tilla plascha, cumprais tuot ils experimaints musicals.

Text: Nicolo Bass