Cur cha’ls uffants han bandunà lur dachasa per imprender e conquistar il muond, han Tinetta e Hanspeter Zogg da Scuol tscherchà ün nouv passatemp. Fingià il bap da Tinetta Zogg vaiva gnü l’idea da fabrichar üna jada sül tet da la ditta da transports ün pitschen garni. El ha stuvü murir massa bod per realisar seis sömmi. La giuvna matta ha stuvü surtour bainsvelt l’impraisa ed insembel cun seis hom Hanspeter Zogg han els pisserà per l’andamaint ed il svilup da l’affar da transport. Sülla fundamainta da l’anteriura garascha han els lura realisà il grond sömmi ed il Garni Arnica cun ot stanzas dublas e duos abitaziuns ha drivi dal 2002 las portas. Culla lavur d’osp es creschü eir il plaschair e la paschiun. Ed eir scha’ls trais uffants vivaivan intant giò la Bassa, nu spargnaivna cun ideas e visiuns. 

Cheudouvra architectonic

Pel giubileum da desch ons, nempe dal 2012, es segui il cheudouvra architectonic, nempe la fabrica da l’elipsa da dschember chi’s preschainta in üna lunghezza da 50 meters. Ed eir pel 20avel anniversari es gnü fat ün pass important: Culla chasa «La Funtana» es gnüda ingrondida la sporta e l’Hotel Arnica ha surgni üna nouv’entrada. L’hotel dombra intant 33 stanzas e minchüna spordscha als giasts ün evenimaint tuottafat special. Il nouv stabilimaint nu porta be il nom «La funtana», dimpersè dà al giast l’impreschiun da rivar our dal grip s-chür in üna stanza clera immez la natüra. E las funtanas cuntschaintas Emerita, Sotsass e Sfondraz nun han be pisserà pel svilup turistic in Engiadina Bassa. Ellas sun eir perdütas da la qualità illas stanzas da la chasa «La Funtana». 

La sporta turistica ill’elipsa da dschember da l’Hotel Arnica a Scuol es gnüda ingrondida cul stabilimaint «La Funtana». Foto: Andrea Badrutt

 

Dal «pop up» al restorant public

Il nouv stabilimaint «La Funtana» es gnü realisà dal 2020. Fingià al principi da l’on 2020 han surtut ils fradgliuns Martina e Domenic Zogg la gestiun dal hotel modern. Lur ideas sun eir gnüdas integradas plainamaing i’l nouv stabilimaint. Per ün’inauguraziun ufficiala nun haja bastü causa la pandemia dal coronavirus. Quista pandemia ha gnü consequenzas eir sün otras spartas da la gestiun d’hotel. «Al cumanzamaint da december 2020 vaina stuvü decider da rivir ün ‹pop up› restorant. Per la stagiun d’inviern vaina lura chattà ün partenari da la Bassa chi’d ha güdà tuot l’inviern», quinta Domenic Zogg da la gronda sfida. Quist «pop up» es lura gnü prolungà fin la fin da la stagiun da stà. «Las bleras bunas experienzas e las bunas reacziuns dals giasts ans han dat curaschi d’investir in üna nouva chadafö professiunala e da fabrichar intuorn la sala da culazchun in ün restorant», quinta’l. Quai es lura eir gnü fat in november e december da l’on passà. Intant es il restorant però stat accessibel be pels giasts d’hotel. 

Certificat «Design & Lifestyle»

D’incuort ha gnü lö ün di da las portas avertas i’l Hotel Arnica a Scuol. Dürant ün di han muossà Martina e Domenic Zogg cun baja, paschiun e plaschair lur zoja architectonica. Daspö quel di es il restorant eir avert publicamaing. «Sün reservaziun», renda Martina Zogg attent. Ils duos giuvens hoteliers rendan eir attent, cha lur sporta turistica es be per creschüts. Ed amo alch es dal tuottafat nouv: l’Hotel Arnica porta nempe daspö ils 1. settember il label «Design & Lifestyle» chi vain surdat da l’associaziun Hotellerie Suisse. Quist certificat vain surdat be ad hotels cun ün’expressiun estetica e cun ün cocept consequaint da qualità sur tuot ils servezzans. «Quai es üna grond’onur e nus eschan fich superbis da pudair preschantar quist certificat», disch Domenic Zogg. 

Las ragischs d’eiran plü fermas

Martina e Domenic Zogg sun respunsabels per la gestiun. Il frar Andrea, chi maina svess amo ün affar da fiduziari a Scuol, s’ingascha ill’administraziun. Tuots trais fradgliuns sun tuornats da la Bassa ed han chattà in ed intuorn l’Hotel Arnica ün dachasa. «Il Arnica es adüna stat ün grond proget da famiglia», quinta Domenic Zogg. Tuots trais sun fich grats a lur genituors chi han miss la basa per realisar il grond sömmi. «Nus vain surgni alas per svolar e ragischs per tuornar», disch Martina Zogg. E quistas ragischs sajan stattas uschè fermas, cha tuots trais han pudü tuornar in Engiadina Bassa cun bleras ideas per l’avegnir. «Ingio cha’l viadi ans maina in avegnir, nu savaina amo. Evidaint es unic, cha tuot la squadra da l’Hotel Arnica decida, in che direcziun cha la via cuntinuescha», declera Domenic Zogg. E quist viadi chi vaiva cumanzà avant 20 ons cul Garni Arnica, es hoz üna perla turistica cun bundant üna trentina d’impiegats. 

Per lur sporta remarchabla, per lur ideas e lur visiuns ed impustüt eir per lur vöglia da tuornar e lavurar in patria, survegnan ils trais fradgliuns da l’Hotel Arnica, il buol dad «Engiadina innovativa» sco bun exaimpel in Engiadina. 

Autur: Nicolo Bass