Var 130 scolaras e scolars visiteschan la scoula primara a Scuol ed il s-chalin ot dombra in media eir raduond 100 giuvenils. Il stadi da la chasa da scoula veglia es desolat: la raboccadüra as schoglia e l’infrastructura electrica muossa l’età dal stabilimaint e nun accumplischa plü il standard da sgürezza. Da star stut, cha quella vain insomma amo tolerada. Da verer ils purtrets, sco cha las scolaras ed ils scolars dal s-chalin ot da Scuol, ston lavurar in stanza da scoula cul nas vi da la paraid e per part sainza plazza da lavur, fa mal il cour. La situaziun actuala a Scuol nun es degna ad üna scoula moderna dal plü grond cumün da la Svizra. Perquai esa d’agir urgiaintamaing. 

La cumischiun «Scoula Scuol+» ha fat üna buna lavur ed ha evaluà tuot las variantas pussiblas. La varianta «detretschamaint», chi vain proponüda da quista cumischiun insembel cun la cumischiun d’immobiglias, fa sen e vala la paina da gnir perseguitada. Da quist proget preschantà in üna sairada d’orientaziun la mità da settember ed illa radunanza cumünala da lündeschdi passà a Scuol, nu profita be il lö da center, dimpersè finalmaing ils uffants da tuot las fracziuns. 

Quant sen chi fa però d’organisar üna votumaziun consultativa a reguard la sanaziun e l’ingrondimaint da la chasa da scoula a Scuol as poja invezza metter in dumonda. Üna votaziun consultativa provochescha bainschi da muossar culur, preschainta però svess be üna tendenza. La legitimaziun da cuntinuar e realisar la visiun segua nempe pür cun acceptar ils credits correspundents per las singulas etappas. Perquai nu faja dabsögn da metter svess obstaculs, chi pudessan retardar tuot il process. Lain sperar cha’l suveran da Scuol pigliarà eir quel impedimaint e muossarà als 27 november ün ferm signal pel proget da scoula, la quala es finalmaing eir la fundamainta d’ün cumün attractiv. 

Commentar: Nicolo Bass