Per la fin da favrer 2023 as retira Diego Deplazes sco secretari general da la Lia Rumantscha. El surpiglia a partir da l’avrigl l’incumbenza sco manader da gestiun da la Crusch Cotschna svizra dal Grischun. Bandunar la Lia Rumantscha nu saja brich stat simpel per el, tradischa el i’l discuors cun la FMR. «L’incumbenza sco manader da gestiun da la Crusch Cotschna es statta talmaing attractiva ch’eu n’ha stuvü trar quella decisiun.»

Co-presidentas nu sun la radschun

In schner 2022 han Gianna Luzio ed Urezza Famos cumanzà cun lur incumbenza sco co-presidentas da l’organisaziun tetala da la Rumantschia. Raduond desch mais davo il cumanza-maint da lur lavur ha il secretari general Diego Deplazes inoltrà sia demischiun. Daja damaja ün connex tanter la demischiun da Diego Deplazes ed il nouv co-presidi? «Na, insomma brich», disch il secretari partent a la FMR, «nus vain gnü üna buna collavuraziun e nus vain lavurà bain vi da la realisaziun da la nouva strategia da la LR.» Las duos co-presidentas Urezza Famos e Gianna Luzio deploreschan la decisiun da Diego Deplazes ed ingrazchan ad el per seis ingaschamaint e la buna collavuraziun (verer intervista separada).

Inavo i’l sectur social

Davo raduond duos ons tar la Lia Rumantscha müda Diego Deplazes darcheu i’l sectur social e da sandà. Quai es ün sectur cha Diego Deplazes cugnuoscha bain: «Avant meis ingaschamaint pro la Lia Rumantscha n’haja lavurà dürant 17 ons i’l sectur social e da sandà. Pro’l nouv post pro la Crusch Cotschna svizra dal Grischun vegn eu a nüzziar bain meis savair e mias experienzas da tuot ils ons in quist sectur.»

Davo la demischiun da Diego Deplazes vain la plazza dal secretari general o da la secretaria generala damaja darcheu scritta oura il prossem temp. Quai conferman las duos co-presidentas. 

Text: Sandro Buchli/fmr