Ils trais concerts da la festa da Stradivari da quist on han gnü lö in gövgia illa baselgia da Guarda cun Maja Weber al violoncello, in venderdi illa baselgia a Scuol cun Lech Antonio Uszynski, viola e Maja Weber, violoncello ed in sonda sül Chastè da Tarasp cul Stradivari Quartett cumplet. A quist quartet piglian part ils duos musicists surnomnats, insembel cun Xiaoming Wang, violina ed il nouv commember e partecipant Stefan Tarara, violina. «Nus eschan fich jent in Engiadina e giodain la cuntrada e l’amiaivlezza dals audituors ed eir la part culinarica», ha dit Maja Weber. Eir quist on han ils trais concerts preschantà la musica da chombra in sias differentas fuormas. Ils trais lös dals concerts sun predestinats per spordscher ün’atmosfera unica chi inrichisch an la musica. In lur cudeschin da program vegnan eir impustüt lodadas las bellezzas da la natüra illa regiun ed ils osps da la part culinarica dal festival. Simpatics sun eir ils aperos chi vegnan offerts davo ils concerts e spordschan la pussibiltà da gnir in discuors culs artists.

Concert illa baselgia a Scuol

Il concert illa baselgia da Scuol cun Maja Weber e Lech Antonio Uszynski ha cumanzà cun ün toc in trais parts da Wolfgang Amadeus Mozart (1756–1791) cun gronda variaziun musicala e cun dumondas e respostas dals duos instrumaints. Il seguond toc da Rebecca Clarke (1886–1979) vaiva üna taimpra musicala tuottafat otra in duos parts. Clarke cun derivanza da l’Ingalterra-americana-tudais-cha vaglia sco üna da las plü cuntschaintas cumponistas inglaisas illa musica da chombra. La prüma part cun bels accords loms e natürals e la seguonda part cun dissonanzas vuglüdas chi han dat al program sport üna taimpra particulara. Il terz toc eir da Mozart ha dumandà dals duos musicists ün indschign da la dainta surprendent cun üna preschantaziun unica. Sco ultim ün toc da Ludwig van Beethoven chi ha satisfat ed ha pisserà per ün concert cun blera variaziun, schabain chi d’eiran preschaints be duos instrumaints e na quatter sco üsità.

Il Quartet Stradivari

Il Quartet Stradivari es ün ensemble cun instrumaints a corda chi ha dat seis debüt pro lur prüm concert da la stagiun al la Tonhalle da Turich dal 2007 ed ha ragiunt sün tuot il muond ün fich bun renom. Il quartet ha sunà fin dal 2017 cun quatter instrumaints dal cuntschaint constructur d’instrumaints a corda Antonio Stradivari da la collecziun da la Fundaziun Habisreutlinger. Il quartet es cuntschaint in Svizra, ma eir sün tuot il muond e dispuona da musicistas e musicists cun distincziuns e divers premis chi sunan eir in oters orchesters e fuormaziuns.

Text: Benedict Stecher/fmr