La fabrica dal Bogn Engiadin Scuol (BES) ha gnü ün grond effet economic a Scuol. Grazcha a quist proget da generaziuns es dvantada tuot l’Engiadina Bassa üna regiun da vacanzas da tuot on, chi nu cugnuoscha bod ingüna stagiun morta. Il BES es ün’attracziun turistica pro bell’e trid’ora e pro mincha stagiun. Però las entradas van inavo e las pernottaziun stagneschan. Tant visiunari ed attractiv cha’l BES d’eira – las regiuns turisticas vaschinas nun han neir dormi. Hoz es il bogn ün da blers e l’attracziun culla sporta roman-irlandaisa nun es plü dumandada. Bainschi sun adüna darcheu gnüdas fattas lavuors da mantegnimaint e da cosmetica. ne daplü, ne damain. Uossa füssa ura e temp pel prossem proget da generaziuns cun investiziuns ill’infrastructura turistica. Quista jada nu basta da far be il necessari. Il böt füss da surpassar la concurrenza e realisar darcheu ün argumaint attractiv ed innovativ per gnir in Engiadina Bassa in vacanzas.
La gruppa da lavur dal proget «Avegnir Infra Scuol» ha fat fingià üna gronda lavur per realisar quist böt. Il BES dess surgnir ün nouv bogn da famiglia, l’areal da Trü dess dvantar ün lö d’inscunter attractiv cun sportas per dadaint e dadoura e Gurlaina dess dvantar ün center da sport e temp liber. Las variantas chi sun gnüdas preschantadas in marcurdi saira a la radunanza d’orientaziun sun stattas bain ponderadas e stan sün üna fundamainta largia. Quellas sun nempe gnüdas elavuradas in differents lavuratoris cun differentas branschas e gruppaziuns. Cun tanta glieud illa barcha, esa però important da nu perder l’aspet d’innovaziun.
Cha tuot las dumondas nu sun amo scleridas es evidaint. Quai nun es gnanca pussibel in quista fasa da proget. Ils detagls da las singulas variantas ed eir las pussibiltats da finanziaziun ston gnir scleridas in ün prossem pass. Quel es però be pussibel, scha las votantas ed ils votants da Scuol acceptan als 12 december il credit da planisaziun dad 1,2 milliuns francs in occasiun da la radunanza da preventiv. Cun ün cler schi as poja dar ün brav stumpel a l’infrastructura turistica sco motor da l’economia regiunala.

Commentar: Nicolo Bass