As imaginai la seguainta situaziun: Vus lavurais daspö desch ons pro ün’interpraisa. Vus vais plaschair da vossa lavur e la paja es in uorden. Però minchatant as dumandais vus co chi dess ir inavant cun l’interpraisa? Ils mainagestiuns müdan quasi on per on e l’etascha strategica suprema (il presidi) disch davo ün on in uffizi chi’s vöglia davo üna prüm’analisa da desch mais far ün’ulteriura analisa per lura transfuormar radicalmaing l’interpraisa. Sainza però concretisar co ed ingio cha quai dess succeder.

Nun esa vaira? – Scha vus füssat ün collavuratur o üna collavuratura dad üna tala interpraisa, lura guardessat forsa i’l prossem temp plü suvent süls inserats da plazzas?

Ma pels circa 20 collavuratuors e collavuraturas da la Lia Rumantscha es quai «courant normal» pel mumaint. Cler, i po capitar cha’ls mainagestiuns müdan. E cler, i po dar ch’ün gremi strategic nun haja amo, davo desch mais, propcha ün plan co chi pudess ir inavant. Però alch füss alch. E nöglia es nöglia. Quai cha’l timun da la Lia Rumantscha – cullas duos co-presidentas e’l secretari general partent – han servi sonda passada a Donat es nempe stat cafè fich cler e sainza bler gust – ün cafè da «sontga Clara», sco cha’ls Sursilvans dischan.

Il secretari general partent ha fat i’l program dal prossem on plü o main «copy & paste» cullas activitats da l’ultim on. E las co-presidentas han zoppà lur prümas experienzas presidialas davo plattitüdas chi fan mal a minchün ed a minchüna chi cugnuoscha il muond rumantsch. Schi, nus savain, id es dad «unir las forzas». Schi, nus savain, la Lia Rumantscha ha potenzial da’s restructurar o da’s transfuormar. E schi, nus savain chi dà bler da far. Però fat il bain e formulai e comunichai visiuns ed ideas concretas, o almain las prümas ideas per ün plan, eir sün basa dals 23 böts strategics deliberats l’on passà. Quellas ideas pudessan tunar uschea: In trais ons daja ün nouv mez d’instrucziun per persunas chi imprendan rumantsch. In tschinch ons ha mincha Rumantscha e mincha Rumantsch dad avair ün telefonin chi discuorra rumantsch. In quatter ons lain nus ün milliun francs daplü sustegn da la Confederaziun. In trais ons daja ün post da cumpetenza pella diaspora rumantscha.

Ils gremis da la Lia Rumantscha (presidi, secretariat, delegadas e delegats) han tuottas e tuots survgni la schanza da pudair crear l’avegnir da la Rumantschia! Lura fat quai per plaschair cun curaschi e cun gust. Cler, i douvra l’analisa ed il temp per far tuot quella lavur. Però il «püschel fluors» da la Rumantschia – ün purtret propagà da las co-presidentas – nu resta frais-ch in etern. E’l curaschi e’l gust füssan musica illas uraglias da collavuraturas e delegadas da la Lia Rumantscha. Per plaschair – ingüna precauziun ed ingüna temma, i va tantüna be pella lingua rumantscha e na per vit’e mort.

Commentar: Nicolo Bass