La fin d’avuost es la giuvna musicista Cinzia Regensburger partida da Scuol per ün sogiuorn musical da tschella vart dal puoz. Il böt d’eira da ramassar experienza sco musicista in residenza a San Francisco e da collavurar musicalmaing cul «Golden Gate Symphonie Orchestra San Francisco» suot la direcziun dad Urs Leonhard Steiner, chi viva regularmaing dürant la stà a Scuol. Dürant ils ultims duos mais es ella statta creativa sco amo mai: «Eu n’ha gnü fingià üna vainchina da concerts e preschantaziuns», quint’la cun grond plaschair. Ella es fascinada da tuot las impreschiuns i’l vest da l’America ed ella sbuorfla d’ideas e creatività. Uschè ha’la pudü far musica sün vias e plazzas, in cabarets e schlers da vin, in ustarias e bars, in stüvas privatas ed in salas da concert. 

Realisà ün sömmi 

Il punct culminant ha gnü lö la fin d’eivna passada. Sco solista al clavazin trais rapreschantaziuns da la «Raphsody in Blue» da George Gershwin insembel cul «Golden Gate Symphonie Orchestra» a San Francisco. Quist toc düra raduond 20 minuts e pretenda grond talent ed affinità musicala. Quist toc divertent vaiv’la fingià sunà per l’examen final da seis stüdi da «Bachelor of Arts and Music» quista prümavaira a Feldkirch. «Ma da pudair sunar sco solista al clavazin accumpagnada d’ün orchester es adüna stat ün sömmi», decler’la. E da pudair far quai dafatta in ün teater d’üna gronda cità in America nu vess’la gnanca ris-chà da s’insömmgiar. E listess es quai capità avant pacs dis: Ün dals concerts ha gnü lö i’l «Clock Tower Benicia» be dasper la cuntschainta punt da San Franciso e sco ultim lura in dumengia saira la preschantaziun davant 700 spectaturas e spectatuors i’l Herbst Theatre a San Francisco. «Quai es stat il plü grond plaschair da mia vita», quint’la plain superbgia da quist mumaint unic. Ed ella ha surgni grond applaus e «standing ovation» per sia prestaziun musicala. «Il public es stat fantastic, eu n’ha giodü il mumaint e nu vaiva ingüna temma da sunar», declera la giuvna musicista chi ha fingià ragiunt quai chi resta per blers be ün sömmi. 

Ün mumaint istoric pel rumantsch

Per pel giallin ha lura pür pisserà quai chi’d es segui al toc principal da Gershwin. Il dirigent Urs Leonhard Steiner ha nempe giavüschà sco supplemaint, ch’ella suna e chanta spontamaing üna da sias chanzuns rumantschas. Quai nu s’ha’la laschà dir duos jadas ed eir sia nouva chanzun «In lain» – chi dal rest cumpara eir sül nouv disc compact in december – ha Cinzia Regensburger chantà da sia paschiun per lain e bos-cha illa natüra in Engiadina. Natüralmaing ün mumaint istoric per la chantadura rumantscha davant ün grond public in America. Ed eir scha las preschaintas ed ils preschaints nun varan inclet ils pleds, hana almain badà la paschiun da la musicista per sia lingua, sia cultura e sia patria ed onurà la preschantaziun cun ün applaus remarchabel. Quai es dal rest eir quai chi’d ha fascinà ha Cinzia Regensburger il plü ferm a San Francisco. «Quia vivan uschè bleras differentas culturas e minchün piglia cun sai ün toc da seis dachasa», quint’la. Ed uschè ha’la adüna visità gugent ils quartiers talians, chinais, spagnöls ed imprais a cugnuoscher las differentas culturas chi s’unischan in üna cità americana. 

Fingià in duos eivnas va a fin la prüma part dal sogiuorn a San Francisco e Cinzia Regensburger tuorna in Engiadina per preschantar e battiar seis nouv disc compact «in movimaint». Fingià in marz tuorna lura la musicista an San Francisco per realisar il prossem proget: nempe da chantar chanzuns dal Holocaust cun Urs Leonhard Steiner e seis «Golden Gate Symphonie Orchestra». E na d’invlidar es eir il proget cumünaivel da la «Nouvavla Sinfonia da Bethoven» chi’d es previs a Scuol e chi’d es intant gnü spostà per ün on per avair daplü temp per chattar la finanziaziun. 

Text: Nicolo Bass