El penda in stüvas, in cafès e furnarias e spordscha üna gronda variaziun d’artichels davart sport, natüra, società, artisanadi, politica, litteratura ed art. I dà da las tuottas i’l Chalender Ladin, miss insembel eir quist on da Bettina Vital.

Las rubricas fixas

Jelscha, Luzia o Victoria opür Quirin, Armon o Emil? – Chi chi tscherch’ün nom rumantsch per seis pop o sia poppa, dess sfögliar i’l chalendari dal Chalender Ladin. Illas rubricas fixas dal chalender daja adüna bler da scuvrir. Quistas paginas orienteschan tanter oter cur chi’d es il di adattà per far aint, buglir o cular da tuottas sorts süjs o cumpots – ün trend chi piglia darcheu pro eir pro’ls giuvens – cur chi’d es glüna creschainta e glüna guarainta e cur chi füss il meglder di per üna nouva frisura.

La cronica da la vita culturala ladina da l’on scuors, redactada da Mario Pult cun bleras fotografias, nu manca neir quist on. Uschè eir duos ingiavineras e s’inclegia las lingias chi rendan omagi e fan algordar a persunalitats da la regiun chi nu sun plü.

Cuorts insajs dal nouv chalender

Cun üna tecnica ch’ella ha sviluppà dürant divers ons e chi’d es gnüda adüna plü raffinada cultivescha l’artista Regula Verdet-Fierz da Guarda fluors da glatsch ch’ella tegna in salv sün palperi e taila. Quellas imbellischan la cuverta dal Chalender Ladin 2023. Illa part da l’art as poja leger ün purtret fich persunal da Flurina Badel chi preschainta l’ouvra vasta da sia vaschina artista.

Schi’s gurada la tabla da cuntgnü, schi spetta il seguaint a lecturas e lectuors: Noe ed Isai Näff da Sent han ün böt cumünaivel, ils gös olimpics. Fadrina Hofmann es statta a far la visita als duos champiuns svizzers. «Duonna Mint» alias Clelia Bieler declera perche chi’d es central da promouver fingià sül s-chalin bass giuvnas indschegneras, informatikers, sviluppadras d’applicaziuns ed electricists da rait. Sidonia Pazeller da Tarasp observa «cha l’uman saja oramai üna bes-cha sociala» e tegna ün pledoyer per daplü cumünanza i’ls cumüns. E Paulin Nuotclà ha inscuntrà ün «archituct». Jachen Curdin Arquint ha sföglià in vegls tschantamaints dals cumüns politics da la regiun chi reglaivan il minchadi politic dal temp da la Republica da las Trais Lias. Co han influenzà Miró e da Goldworthy la scoulina da Puntraschigna? Scolaras e scolars da la 6avla classa da Müstair rapportan tanter oter da la visita dal Minisguard in classa, dal mumaint ingio chi ha gnü nom l’on passà chi possan büttar la mascrina i’l s-chartaröl. Quist ed amo bler daplü as poja leger i’l Chalender Ladin 2023.

Üna pitschna squadra efficiainta

Per la sesavla jada cumpara il Chalender Ladin in redacziun da Bettina Vital, oriunda d’Ardez. La romanista piglia jent incunter contribuziuns. Pella part grafica es respunsabel il cumpositur Jon Duri Gross dad e-grafica a Lü. Lavuors da traducziun e correctorat han surtut quist on Chatrina ed Andrea Urech e Sidonia Klainguti. La redactura es grata a tuot las contribuentas e contribuents dal Chalender Ladin 2023 ed a tuot ils inserents chi pussibilteschan da mantgnair quist magazin da cultura indigen.

Il Chalender Ladin 2023 as poja retrar pro’ls cuvis, postar o abunar sülla pagina da l’Uniun dals Grischs opür cumprar in diversas librarias e butias in Engiadina e Val Müstair. (cdm)