Erich Sulser, il manader finanzas dal cumün da Zernez, ha preschantà in mardi saira ün preventiv dal quint da success per l’on 2023 precaut-optimistic ma averti la populaziun, da ponderar bain in avegnir mincha singula sortida. El ha fat quai suot l’impreschiun dal preventiv d’investiziuns cha’l suveran ha approvà sainza cuntervuschs ma cun duos abstenziuns. Quel prevezza pel 2023 investiziuns nettas da 5,6 milliuns francs. Dasper l’aigna finanziaziun resta ün manco da finanziaziun da raduond quatter milliuns francs chi sto gnir cuvernà cun nouvs credits da banca. Ed il squitsch d’investiziuns resta pel cumün eir i’ls prossems ons inavant ot.

Unanimamaing ha la radunanza deliberà in seguit il preventiv dal quint da success chi fa quint pro sortidas da s-chars 21 milliuns francs ed entradas da bundant 21,6 milliuns cun ün guadogn da 672 179 francs. Quai pro amortisaziuns in l’import da 962 900 francs e deposits a las finanziaziuns specialas da 178 200 francs. Il cashflow s’amunta previsibelmaing a s-chars 1,6 milliuns francs e cun quai ligermaing plü ot co previs per l’on curraint. 

Cun üna vusch d’abstenziun ha il suveran approvà eir il pè d’impostas cumünal. Quel resta inavant sün 84 pertschient da l’imposta chantunala. Implü es il suveran gnü infuormà sur dal quint annual 2021 da l’EE-Energia Engiadina. Quel serra cun ün guadogn net da 1,26 milliuns francs, bundant 200 000 francs sur il quint dal 2020.

Il vicepresident Riet Denoth ha implü infuormà – in sia prüma ed ultima radunanza cumünala illa funcziun sco president cumünal ad interim – sur dal müdamaint persunal i’l post da coordinaziun turistica. Uschè ha impiegà la direcziun operativa il suprastant scadent Stefan Bühler sco nouv coordinatur turistic. El cumainza sia nouva carica als 1. schner e segua a Fabian Schorta chi ha decis d’instradar üna nouva via professiunala. 

Orientà ha Denoth eir sur da la ledscha da chamonnas cha’l suveran vaiva fat bun dal 2017. Per evitar ch’interessents in singulas fracziuns gnian dischavantagiats illa pussibiltà da tour a fit chamonnas, ha la suprastanza cumünala decis da sistir las fittanzas 2022 e d’instradar üna revisiun parziala da la ledscha da chamonnas avant co instradar cullas fittanzas pendentas.

Riet Denoth ha pudü saramantar in seguit il nouv – vegl – president cumünal, Domenic Toutsch. El surpiglia il timun dal cumün a partir dals 1. schner. Toutsch ha alura prosegui culla saramantaziun e fat quai culla nouv eletta suprastanta Irma Tognini, ils nouv elets suprastants Duosch Städler, Armando Roner sco eir il reelets Simon Rohner da Lavin e Riet Denoth. S-chüsà as vaiva il nouv elet suprastant Jürg Wirth da Lavin. 

Riet Denoth ha terminà la radunanza cul cumgià da diversas persunas chi termineschan pella fin da l’on lur caricas cumünalas. Quai sun Seraina Bickel chi terminescha 19 ons carica politica – ündesch ons illa suprastanza cumünala da Susch ed ulteriurs ot ons in quella dal cumün fusiunà Zernez – sco eir Stefan Bühler davo desch ons, Brigitta Enkerli e Beat Schärer davo quatter ons illa suprastanza. Implü es gnü tut cumgià da Jolanda Andri e Gian Thom davo ot, respectivamaing ündesch ons i’l cussagl da scoula e da Susanna Denoth davo ot ons illa cumischiun sindicatoria.

Text: Jon Duschletta