Il nomer dals Rumantschs e da las Rumantschas s’amunta daspö decennis a circa 40'000 ed es uschea quasi stabil. Var 40 pertschient vivan i’l territori rumantsch, 60 pertschient i’l chantun Grischun. Il fat cha Surses e la Muntogna da Schons vegnan attribuits uossa al territori tudais-ch nun ha dimena da chefar in mincha cas cun üna reducziun da las persunas chi discuorran rumantsch.

Il nomer da persunas chi discuorran tudais-ch illas regiuns tradiziunalmaing rumantschas crescha, ma quai es uschea fingià daspö chi’s fa dombraziuns – daspö l’on 1860. Quai pertocca impustüt lös turistics. Uschea hajan lös turistics in Engiadin’Ota e la Tumgias-cha müdà fingià avant passa 120 ons dal territori rumantsch al tudais-ch. La müdada dal territori rumantsch al tudais-ch haja cuntinuà adüna daplü illa seguonda mità dal 20avel tschientiner. Da l’on 2000 fin pro l’ultima revisiun dals territoris da lingua l’on 2017 sajan ils cunfins da lingua però restats stabils. (sda/fmr)