Quai es stat ün mumaint istoric ill’istorgia da l’unità in Germania: Cuort davo cha’ls mürs sun crodats, ha chantà l’actur american David Hasselhoff a Silvester 1989 la chanzun «Looking for Freedom» sün ün palc davant il portal da Brandenburg a Berlin. Quist act musical sta eir per la libertà e l’uniun da la Germania da l’ost e dal vest. 

Ma chi s’algorda amo, cha David Hasselhoff vaiva concertà dal 1994 eir a Vulpera? Il böt da quella jada nu d’eira d’unir ils da Tarasp cun quels da Scuol, ma da muossar cha l’Engiadina Bassa nun es a la fin dal muond. Cun gronds camiuns es gnü transportà tuot l’equipamaint illa halla da tennis a Vulpera ed il grond «star» da las serias americanas ha chantà sia imna da libertà in üna halla plaina d’Engiadinaisas ed Engiadinais. Per ün mumaint d’eira Vulpera i’l center da l’univers e sper il chantadur da nom e pom staivan plüssas acturas in büschmaints da nodar co
tschens e cun bojas da salvamaint per salvar l’Engiadina dal najantar...

Trent’ons sun intant passats e forsa nu saja plü inandret, scha tuot ils detagls sun memoria o fantasia. In mincha cas d’eira quai ün mumaint da libertà. 

L’actur american ha in seguit adüna darcheu pisserà per lingias grassas – però na adüna be positivas. Gronda es perquai statta la surpraisa avant bod ün on, cur ch'eu n’ha surgni ün bigliet per ün concert da David Hasselhoff als 1. avrigl 2023 a Dübendorf. Viva quel insomma amo? Nun e’l eir najantà? O es quai tuot be ün spass d’avrigl? Intant s’ha sclerida la chosa – il concert chi vess gnü lö in ün mais es nempe gnü sdit giò. Our da motivs da sandà, vegna scrit in differentas gazettas. Ed uossa e’l quia darcheu, quel mumaint da libertà – liber da nu stuvair visitar il concert dal senior intant ün pa senil – chi prouva da chantar actualmaing dafatta in tudais-ch – e da pudair far be quai chi’m plascha. 

Columna: Nicolo Bass