In sonda saira ha gnü lö il concert da la Società da musica Ftan illa sala polivalenta da la chasa da scoula a Ftan. Suot la bachetta da Jon Armon Strimer han las musicantas ed ils musicants preschantà ün püschel musical da prümavaira per tuot ils gusts. Il punct culminant avant la posa es sgüra stat il toc «Queen in Concert» cun ün potpurri da melodias da Freddie Mercury e sia cuntschainta band Queen, arrandschà da Jan van Kraeydonck, alias Frank Bernaerts. Cun seis nom original ha Frank Bernaerts eir arrandschà la chanzun Planes cha la Musica da Ftan ha sunà sco ultim toc avant la posa. Da manzunar in quista prüma part es natüralmaing eir la chanzun grischuna e rumantscha «In siemi» da Gin Balser Casnova, chi’d es gnüda arrandschada da Thomas Rüedi. 

Musica indigena d’ün muoj da Ftan

La seguonda part dal concert ha cumanzà cun üna surpraisa musicala: las musicantas ed ils musicants da Ftan han nempe sunà il toc «Rocket Journey» da Jason Lankford. E chi ma vess cret cha davo quist nom as zoppa ün «muoj» da Ftan? Jason Lankford sta nempe per l’avaina musicala dal magister Janett Lehner oriund da Ftan. Il concert ha in seguit cuntinà cun marchas e polcas ed es tuornà cul «Number 7» illa musica da trategnimaint moderna. Quia ha muossà ün dals plü giuvens musicants si’abiltà sülla trumbetta ed ha natüralmaing surgni ün grond applaus. Eir per l’ultim toc dal concert «One Moment In Time» sun stats ils giuvenils i’l center. Quista chanzun cuntschainta da Whitney Houston ha la Società da musica Ftan sunà insembel cun scolaras e scolars da la Scoula da musica Engiadina Bassa chi vivan a Ftan. 

Bun’egualisaziun d’età

La Società da musica Ftan, chi s’ha preschantada cun üna trentina da musicantas e musicants cun üna bun’egualisaziun d’età, ha pisserà cun lur program varià per plaschair pro las spectaturas e pro’ls spectatuors. Minchatant as vessa però giavüschà da las musicantas e dals musicants, e natüralmaing eir dal dirigent, ün pa daplü 
ris-ch pro la tscherna d’arrandscha
maints plü pretensius e pro l’interpre
taziun dals tocs. Per exaimpel ha strichà il dirigent pro la cuntschainta marcha «Schwyzer Soldaten» plü o main las parts tecnicas e plü difficilas dals instrumaints gronds ed uschè mancaiva ün pa il latmilch süllas chastognas. 

Il dirigent Jon Armon Strimer maina daspö l’utuon 2010 la Società da musica Ftan. El es stat magari cuntaint culla prestaziun da sia musica. «Il böt d’eira da ragiundscher üna bun’egualisaziun e quai vaina fat», ha’l respus sün dumonda. La Società da musica Ftan ha eir installà l’on passa üna gruppa da lavur chi’s dedicha a l’ave
gnir da la società e tschercha ün nouv dirigent pel futur. «Eu n’ha declerà da vulair cuntinuar fin cha nus chattain üna buna soluziun persistenta ed a lunga vista», ha infuormà Jon Armon Strimer. Pel dirigent e sia musica nun es la stagiun da musica uossa amo a fin. Davo üna cuorta posa as prepara la Società da musica Ftan per sunar a la Festa da giubileum da la Società da musica Tschlin chi ha lö als 24 da gün a Sclamischot. 

Autur, fotografia e video: Nicolo Bass