La radunanza cumünala da Scuol ha acceptà in lündeschdi saira il rendaquint 2022 chi serra cun ün guadogn da 6,75 milliuns francs. Previs d’eira vairamaing ün s-chavd da s-chars ün mez milliun francs. Sco cha’l manader da la partiziun da finanzas dal cumün da Scuol Viktor Glaser ed il capo cumünal Aita Zanetti han infuormà in radunanza, sun stattas impustüt las entradas fiscalas bainquant plü otas co büdschetadas. Da manzunar es impustüt eir cha las entradas dals fits d’aua s’han diminuidas marcantamaing causa l’on idrologic pac favuraivel. Las investiziuns nettas importan 6,5 milliuns francs, büdschetadas d’eiran investiziuns nettas da s-chars 13,3 milliuns francs. Dal rendaquint cumünal resulta, cha la facultà per abitant s’amunta a 6950 francs. Il grà da l’aigna finanziaziun importa bundant 150 pertschient, l’on avant d’eira quel dafatta 343 per
tschient. L’agen chapital dal cumün da Scuol es uschè gnü dozzà sün 83,9 milliuns francs. Cha’l resultat saja bainschi allegraivel, ha manià Aita Zanetti. Cha quel saja eir necessari, impustüt eir in vista a las grondas investiziuns chi spettan ils prossems ons. 

Nouvas aczias da las pendicularas

Sün proposta da la suprastanza cumünala han decis las preschaintas ed ils preschaints in radunanza cumünala eir da sustgnair las Pendicularas Scuol SA cun ün import dad 1,8 milliuns francs. Per quist import survain il cumün aczias da la società anonima. La Pendicularas Scuol SA renovescha ils prossems ons cumplettamaing il stabilimaint sülla Motta Naluns chi cumpiglia ils restorants da muntogna La Charpenna e La Motta e tuot ils locals pellas gestiuns tecnicas, maschinas ed innaiver. Il restorant vain construi nouv. Cha la finanziaziun dal proget saja bainschi garantida, han infuormà il president dal cussagl administrativ Andri Lansel, ed il manader da gestiun da la Pendicularas Scuol SA Andri Poo. Ma cha cul sustegn dal cumün possa la ditta restar finanzialmaing flexibla e possa eir reagir al marchà. Sco cha Andri Lansel ha infuormà in radunanza cumünala vain decis l’augmaint dal chapital d’aczias in occasiun da la prosma radunanza generala da la Pendicularas Scuol SA. Cha in quell’occasiun dessan eir ils ulteriurs acziunaris ed oters interessents surgnir la pussibiltà da segnar aczias. 

Taxa a favur da la generalità

Per daplü discussiun ha pisserà la tractanda per fixar la taxa d’energia a favur da la generalità. Tenor la ledscha d’energia dal cumün da Scuol sto quista taxa gnir fixada minch’on. Fin avant ün on importaiva quella 1,5 raps per urakilowatt. L’on passà es la taxa gnüda sbassada sün ün rap, impustüt eir causa cha’ls cumüns concessiunaris ston pajar inavo, tenor decisiun dal güdisch federal, sur trais ons var ot milliuns francs cuosts da transport. La suprastanza cumünala ha perquai proponü da fixar la taxa eir per l’on 2024 sün ün rap. Sün quai ha Not Carl fat la proposta da s-chassar quista taxa, impustüt eir causa cha’l rendaquint dal cumün da Scuol saja uschè allegraivel e cha la suprastanza cumünala nun haja actualmaing ingün motiv per inchaschar quista taxa implü. Al listess mumaint ha’l eir surdat preventivamaing üna moziun per predschs da forza corrects a la suprastanza cumünala. Las preschaintas ed ils preschaints in radunanza cumünala sun però seguits cun 47 cunter 18 vuschs a la proposta da la suprastanza cumünala culla vöglia da s-chaffir üna reserva finanziala per tuot las investiziuns e sfidas finanzialas chi seguan ils prossems ons. Quista taxa d’energia a favur da la generalità maina nempe plü o main 750 000 francs al cumün da Scuol. 

Votumaziun a l’urna in settember

Implü han las votantas ed ils votants acceptà la cunvegna da prestaziun culla Engiadina Scuol Turissem SA (ESTAG) pels prossems tschinch ons e deliberà la Ledscha da taxas pella ledscha da fabrica e la revisiun parziala dal plan general d’avertüra da la zona da man-
steranza Pozzet a man da la votumaziun a l’urna dals 24 settember. In quella votumaziun a l’urna stuvaran decider las votantas ed ils votants dal cumün da Scuol eir a reguard il proget da Scuol Solar. Sco cha’l capo cumünal Aita Zanetti ha infuormà, varà lö ün’orientaziun publica in quist reguard als 21 avuost. Fingià la fin da lügl trattarà la radunanza dal cumün da vaschins in chosa. 

Text: Nicolo Bass