Il cumün da vaschins es proprietari dal terrain a Sur Bos-cha dasper il territori da skis Motta Naluns sül qual dess gnir installà ün implant fotovoltaic. Realisà vain il proget da la società simpla Scuol Solar. A quella fan part il cumün politic Scuol, la Energia Engiadina e las Ouvras Electricas Engiadina. Il proget prevezza ün implant solar sün var 75 ha chi prodüa forza electrica per 20 000 chasadas. In ün prossem pass ha dad acconsentir amo la populaziun da Scuol al proget. La votumaziun a l'urna ha lö als 24 settember. (fh)