Daplü co be furtüna

Chouni sezza vi da la maisa virtuala, cul man dret giova’l culs chips e lascha rodlar quels sur ils daints dal man. Sia vista es concentrada e sainza mimica. El püffa sün sias duos cartas suogliadas sün maisa ed el nu fa bau. Vi da la maisa sezzan in tuot nouv persunas, minchüna prouva da leger las reacziuns da l’adversari: Ha’l propcha bunas cartas, o es tuot be ün blöf? Il «Dealer» metta ün’ulteriura carta sün maisa. Duos egualiseschan l’import, ün dozza la missa – e che fa Chouni? El va «all in»!

Avant duos eivnas ha tut part Chouni – quai es seis nom pella plattafuorma online da poker (la redacziun cugnuoscha eir seis dret nom) – ad ün turnier online da poker cun 13 000 partecipantas e partecipants. A la fin – davo passa set uras – es el dvantà quart. El ha pajà 100 francs per as partecipar ed ha guadagnà var 3000 francs. Üna flotta paja dal di.

Chouni giova daspö 20 ons regularmaing a poker sülla plattafuorma online «PokerStars». Tanteraint d’eira ün temp la partecipaziun da persunas svizras scumandà, intant ha la Casino Davos AG surgni üna concessiun correspundenta e quella società anonima collavura culla plattafuorma digitala «PokerStars». Mincha commember sülla plattafuorma vain verifichà e controllà. Chouni as regorda cha plü bod as partecipaivan eir bleras persunas americanas e russas a quists turniers online. Intant però nun han quels plü ingün permiss. Eir in Italia sun ils gös oline gnüts scumandats. Sülla popularità dal gö nun ha quai ingün’influenza: «Mincha per minuts cumainza ün nouv turnier online ed i’s pudess giovar di e not», quinta il giovader da poker engiadinais. Ch’el giova regularmaing trais fin quatter jadas l’eivna turniers plü lungs o plü cuorts, fin aint pella not aint. Cha minchatant gnia eir avant, ch’el indurmainza sün let davant il laptop e perda lura la missa. «Grit faja gnir, scha quai capita dürant ils finals», quinta’l cun daplü mimica sco dürant ils gös da poker.

Ma che es insomma la fascinaziun da quist gö chi til piglia la sön? «Il gö da poker am plascha fich bain. I voul furtüna, savair, san inclet, concentraziun e blera pazienza – e forsa eir talent da leger ils impissamaints dals adversaris.» Cha sia tactica saja quella, d’avair pazienza e da nu ris-char massa bler. E cha sper tuot il savair, voula natüralmaing eir blera furtüna.

Chi chi ris-cha, guadogna, disch il proverbi. Ma apunta na adüna. Chi chi ris-cha po eir perder. Chouni invezza prova da restar cool e da far seis gö. «E scheu am partecipesch ad ün turnier, schi pel solit riva eir magari inavant», quinta’l. E quai demuossa, cha sia tactica nun es nemia na sbagliada. Ma cur cha la furtüna manca, esa meglder da rafüdar subit. Chouni resta realist: «Üna jada as guadogna, üna jada as perda. A la fin restaraja glisch.»

Pro mincha turnier da poker esa da pajar üna contribuziun d’entrada: desch francs, tschient francs, milli francs, o amo daplü. Tuot tenor la missa daja lura eir daplü o damain guadogn pels ven- dschaders. Chouni giova pel plü per desch o tschient francs. Ch’üna jada i’l Casino a Seefeld in Austria haja’l giovà fisicamaing cun ün import d’entrada da milli francs. Cha quai saja stat ün evenimaint tuottafat special. Ch’el giaja regularmaing eir i’ls casinos a giovar a poker. Cha’l contact persunal culs giovaders saja listess alch oter, co ils turniers online. Il Silvester passainta’l minch’on i’l plü grond local da poker in Europa, nempe i’l Casino King’s Ressort a Rozvadov (vain nomnà eir Rozvegas) in Tschechia. In quel stan 160 maisas da poker üna sper tschella ed ils turnier düran plüs dis.

Cha exagerà gnia – co füssa eir oter – eir in America. Cha a Las Vegas vegnan giovats minchatant turniers da plüs dis cun fin 30 000 persunas, quinta’l. O lura eir da quels cun contribuziuns d’entrada da 10 000 francs e cha’l ven- dschader guadogna lura ses, set mil- liuns francs.

Eir Chouni voul üna jada provar da viver be dal gö da poker, sainza stuvair lavurar. Quai füss seis böt in ün, duos ons. Da sömmis nu discuorra’l. Cha sömmis pel solit nu vegnan vardà. E co füss quai da tour part üna jada a quels gronds turniers da milliuns in America. «Quai nu stossa avair. Eu nu sa inglais, che dessa lura far a Las Vegas», disch Chouni cun ün rier in fatscha. Seis muond da poker es plütost in vicinanza. Cha grondas ambiziuns hajan eir ils respunsabels dal casino our il Principadi da Liechtenstein. «Para chi investischan per davantar svess la plü gronda stüva da poker in Europa», quinta il giovader da poker paschiunà. Cha’l potenzial da giovadras e da giovaders saja fich grond, e cha quel saja eir creschü dürant la pandemia da covid. «Scha tuot quels chi giovan regularmaing a poker online, vulessan giovar in ün casino, schi füssan tuot las sportas actualas massa pitschnas», declera’l. Ma nun es il privel grond pro quists gös da furtüna da gnir massa arsantà? Chouni negescha: «Eu fetsch quai per passatemp e perquai cha’l gö am plascha», quinta’l. Cha oters guardan per la paja mincha saira quatter fin ses uras da tuot il chaschöl illa televisiun. Ed uschè ha minchün seis vizi. Quel da Chouni es cumbinà cun furtüna e culla spranza da surgnir il dret mumaint il «Flush Royal».

Text: Nicolo Bass

Fotografia: Shutterstock/II.studio