Al terz di dals cuors d’utuon dal «Lö d’inscunter Chasa Fliana» a Lavin ha Imke Marggraf referi davart soluziuns grazcha a la dramaterapia. Davo il salüd da Berta Marugg, persuna da contact dals cuors e referats da mardi passà ha il ravarenda Magnus Schreich fat üna cuorta meditaziun: «Eu n’ha üna tscherta affinità cul tema dal referat chi segua. Far experienzas nouvas da fats incuntschaints da sai svess. Da chattar üna metoda per incleger ils texts da la Bibla per scuvrir che cha quels vöglian dir. La metoda as nomna bibliodrama ed es gnüda creada dals ons 70 impustüt per l’instrucziun in scoula.» El ha manzunà ün pêr exaimpels ed uschè manà a l’auditori in direcziun dal referat.

Pratcha a Scuol

Imke Marggraf deriva da la Terra tudais-cha ed abita a Scuol. Ella ha ün’aigna pratcha chi s’occupa dal tema dal referat, ha lavurà in Chasa Puntota a Scuol ed actualmaing eir a l’Ospidal d’Engiadina Bassa illa clinica curativa: «Eu sun gnüda invidada da tgnair ün referat davart il tema dramaterapia. Eu less manar a Vus sün üna excursiun chi’s tratta da far ed agir.» Cun acziuns praticas ha ella invidà als preschaints per exaimpel da contemplar quai chi vezzan, da müdar plazza da sezzer e da verer da là davent che chi’s ha müdà.

Far sco scha, e müdar perspectiva

«A mai vaja da far sco scha, e da müdar las perspectivas e da’s render in qualchosa chi nu correspuonda al minchadi. E tuot in giovond.» Perche far sco scha e chi douvra ün tal sustegn? «Sch’eu vegn pro’l meidi schi survegna ün trattamaint, ma na alch chi ha da chefar culla psica e cull’orma», ha de- clerà la referenta. Chi’s haja badà cha terapias survegnan üna dimensiun vieplü gronda e chi detta adüna daplü glieud chi dia chi hajan profità da terapias, ha’la constatà. «I dà mumaints ingio chi s’es in ün lö, in ün local ingio chi’s douvra agüd perquai chi nu’s sa plü co inavant. A la fin dals quints as chatta però suvent eir ün’aigna soluziun, adüna eir cun müdar perspectiva ed as orientar inavant.» La referenta ha lavurà a Scuol il prüm on e mez illa Chasa Puntota cun umans attempats ed ha gnü inscunters ingio cha’ls inquilins han spons larmas avant d’esser pronts da bandunar lur vita. Uffants pitschens cumainzan lur vita cun giovar e scuvrischan uschè a sai svess, giouvan cun giovarets, disegnan e giouvan rollas cun oters uffants.

Surmuntar crisas cun terapias

«Pêrins passaintan adüna darcheu crisas – esser inamurà es fich bel, ma surmuntar crisas es üna lavur difficila.» Chi vegna hozindi pro crisas svelt discurrü e ponderà da’s divorziar, ha manzunà Imke Marggraf, «in tals mumaints po üna terapia güdar e dar inviamaints per schoglier il problem.» Ün’otra terapia po eir esser, sco ch’ella ha cuntinuà, da giovar teater, as travestir e dvantar per ün mumaint ün oter uman: «Cun stübgiar vi d’ün problem e cun dovrar ün oter areal dal tscharvè as chatta minchatant eir üna solu- ziun.» La dramaterapia po güdar tenor ella in bleras situaziuns. Cha’ls umans possan viver cun damain problems, schi vegnan trattats inandret, «e quai capita scha la relaziun tanter terapeut e paziaint es buna.» Pro tschertas terapias surpiglia eir la chascha d’amalats üna part dals cuosts.

Text: Benedict Stecher/fmr