Dal cussagl da fundaziun da la Tessanda a Sta. Maria fan part Maya Repele da Sta. Maria daspö l’on 2017, Rita Ziegler da Küsnacht daspö il 2020, Barbara Janom Steiner da Cuoira daspö il 2020 e Dorothea Köppe da Rapperswil daspö il 2022. Uossa survegnan las commembras dal cussagl amo il sustegn da Monika Bütler. Ella ha stübgià matematica, fisica ed economia ed es uossa economa independenta. Fin da l’on 2021 d’eira ella professura per politica d’economia e directura da l’Institut für empirische Wirtschaftsforschung a l’Università da San Galla. «Realisar il proget per ün nouv stabel a Valchava pella Tessanda es fich cumplex», scriva il cussagl da fundaziun da la Tessanda illa comunicaziun als mezs d’infuormaziun, «perquai esa tenor il cussagl eir consequent da rinforzar il gremi.»

Stoffa, fils, la lavur textila e sia istorgia fascineschan a Monika Bütler daspö seis ons da giuventüm. Uschea es ella dvantada, davo üna visita a la Tessanda, dal 2022 commembra da la società da fauturas e da fauturs da la Tessanda. Sco cha la nouva commembra dal cussagl da fundaziun as lascha citar illa comunicaziun als mezs d’infuormaziun es ella fascinada da la Tessanda, da sia attractività e da seis proget da fabrica a Valchava. Chi saja per ella ün’onur da pudair contribuir sia part pel prosperar da la Tessanda, conclüda Monika Bütler. (cdm/fmr)

FMR

La FMR (Fundaziun Medias Rumantschas) furnischa cuntegns medials scrits (per exaimpel texts e graficas) e fotografias per mans da las medias rumantschas. Ella scriva seis artichels in tuot ils tschinch idioms ed in rumantsch grischun. La FMR incumbenzescha eir a persunas rumantschas dastrusch e lontan da scriver columnas sur da quai chi tils occupa illa vita da minchadi.