Promoziun dal gö da tschoccas

L’on passà al principi da favrer ha gnü lö il prüm turnier da tschoccas per scolaras e scolars da Scuol illa halla da glatsch Gurlaina a Scuol. Quella jada han tut part var 150 uffants a quist turnier chi’d es gnü organisà da la scoula da Scuol. Pel magister da sport esa nempe important, cha’ls uffants vegnan in contact cun differents sports, per exaimpel eir cul gö da tschoccas. Cuort avant las vacanzas da Nadal ha lura gnü lö il seguond turnier da tschoccas per uffants, organisà da la scoula da Scuol in collavuraziun culla Associaziun grischuna dal sport da tschoccas. La gövgia avantmezdi es statta la scoula primara da Scuol e contuorns sül glatsch illa halla da Gurlaina, il venderdi avantmezdi es lura segui il s-chalin ot da Scuol. Eir quista jada sun gnüts var 140 uffants in contact cul gö da tschoccas ed han provà da stumplar la tschocca il plü dastrusch al puck nair. 

Special quista jada es stat il fat, cha la megldera squadra dal s-chalin ot s’ha eir qualifichada per las Maenstranzas Svizras da tschoccas chi han lö dals 23 fin als 25 da schner a Scuol. «Per promover il sport da tschoccas pro la giuventüna da l’Engiadaina vaina surgni il permis excepziunal da pudair annunzchar üna fin duos squadras da giuvnas e giuvens per la maestreanza svizra dals juniors», declera Nicolo Bass, president da l’Associaziun grischuna da tschoccas ed organisatur da las Maestranza Svizra da tschoccas a Scuol. Sco ch’el quinta as das-chan partecipar a la Maestranza Svizra be juniors cun licenza. Cha perquai haja l’Associaziun svizra da tschoccas fat ün’excepziun e dat per duos squadras ün permiss special. Quels uffants chi s’han uossa qualifichats respectivamaing chi vöglian as partecipar a la maestranza svizra han la pussibiltà da tour part a differents trenamaints dal club ES Sur En per imprender las reglas e las finezzas dal gö da tschoccas. Il ES Sur En organisescha ils trenamaints il marcurdi davomezdi sül glatsch a Sur En, uschè cha’ls uffants rivan cul trafic public fin dasper il glatsch. Il president da l’Associaziun da tschoccas grischuna spera cha’ls uffants chattan uschè la vöglia pel gö da tschoccas e cha las ambiziuns creschan lura culs trenamaints. 

Pel turnier da tschoccas dals uffants han ils clubs da tschoccas da San Murezzan e da Sur En miss a disposiziun tuot il material. Quists duos clubs, insembel cun tuot ils clubs dal Grischun e dal Tessin, organiseschan suot il tet da l’Associaziun da tschoccas grischuna las Maestranzas da tschoccas 2026 e 2027 a Scuol. Var 130 sportistas e sportists da tschoccas da tuot la Svizra as parteciparan dals 23 fin 25 schner a las maestranzas svizras illa halla da glatsch Gurlaina a Scuol. In desch differentas categorias vegna giovà pel titel da champiun o champiuna svizra da tschoccas. Tanter quellas categorias sun eir duos categorias da juniors. Las maestranzas cumainzan il venderdi cullas concurrenzas singulas. Pro la concurrenza singula dals homens tocca eir Claudio Mathieu da Ramosch (ES Sur En) pro’ls favorits. El es gnü champiun svizzer dal 2024 e vice-champiun svizzer dal 2025. Pro’l gö da squadra tocca ils ultims ons eir la prüma squadra da Sur En pro las megldras tschinch squadras da la Svizra. Ils gös da squadra han lö la sonda e la dumengia segua la concurrenza da las squadras mix e dals juniors. Mincha di vers saira han lö las rangaziuns cun accumpagnamaint musical. In sonda saira ha lö la sairada da sportistas e sportistas. Quella saira pissera la Rümli Gäng dad Ardez pel trategnimaint musical. (cdm/pl)