La scoula da scriver es ün success

L’autura e schurnalista Angelika Overath ed il scienzià da litteratura Manfred Koch instruischan daspö blers ons in differents lös in Svizra sco eir a l’ester. Els han lavurà in scoulas, universitats ed illa fuormaziun da creschüts. Tuots duos han adüna darcheu accumpagnà la naschentscha da romans, da collecziuns da poesias e dad oters cudeschs. Dal 2012 ha il pêrin co-inizià il cuors immersiv rumantsch «A Sent be rumantsch», il qual ha eir sport scriver creativ in vallader. L’interess da bleras partecipantas e blers partecipants tils ha manà süll’idea da s-chaffir üna scoula da scriver a Sent. 

Avant tschinch ons ha gnü lö il prüm cuors da la scoula da scriver aint in üna stanza da dschember illa Chasa Misoch dasper la baselgia da Sent. Intant s’ha la sporta etablida ed ils cuors sun adüna svelt occupats. «No vain consciaintamaing be ses, set scolaras perquai cha tuottas e tuots schoglian las istessas lezchas e lura discuttaina ils resultats», declera Angelika Overath. Per ella e seis hom saja important da pudair eruir ingio chi sun ils duns da la partecipanta o dal partecipant e da promover a quella persuna sün sia via. «Mo fich bler imprendan las partecipantas e’ls partecipants illa gruppa», disch la manadra dals cuors. Il congual güda ad imprender da maniera intuitiva. 

Aint ils cuors vegnan ils texts glimats ed ils experts dan tips per tils megldrar. I va adüna eir per giovar culla lingua ed eir cun plüssas linguas - eir cul rumantsch. Ün exercizi es per exaimpel da scriver üna poesia da l’infanzia in üna lingua estra. Las partecipantas ed ils partecipants derivan da Turich, Basilea, Bern, ils pajais vaschins ed eir da l’Engiadina. La gronda part ha l’età 50 plus. Tschertas persunas s’han dedichadas lur vita intera ad üna chosa o ün manster e lessan uossa finalmaing cumanzar a scriver. Otras sun pensiunadas e vessan jent da scriver sü lur vitas sco relasch pels uffants o abiadis. Bleras partecipantas e partecipants vegnan adüna darcheu a far cuors. 

Üna particularità da la scoula da scriver a Sent es cha las gruppas creschan insembel. Illa gruppa pitschna as sviluppan amicizchas e colliaziuns. Ir davo scoula amo insembel a mangiar la pizza o far insembel üna spassegiada tocca simplamaing pro. «In nos cuors daja üna basa da fiduzcha, i nu va per valütar, dimpersè per dar ün spejel e laschar reflettar davart l’agen scriver», spiega Angelika Overath. 

Critica vicendaivla resta constructiva, situaziuns da concurrenza nun han lö in quist ravuogl. «Ün dals plü bels cumplimaints ch’eu n’ha survgni es ch’inchün m’ha dit: Angelika, ingio cha tü est, es adüna famiglia», disch la mainascoula. Üna gruppa ha s-chaffi davo il cuors dafatta üna gruppa da leger e scriver a Cuoira. Ils cuors a Sent portan dimena früts. «Quai chi fa grond plaschair es chi sun gnüts edits intant fingià cudeschs da partecipantas e partecipants da nos cuors», quinta Angelika Overath.

La scoula da scriver a Sent vain sustgnüda da differentas varts, tanter oter eir dal Cumün da Scuol e dad Energia Engiadina. «Per pudair far inavant eschna dependents da sponsuors», disch Angelika Overath. Chi chi’s less far ün purtret da quai chi resulta dals cuors a Sent po gnir a tadlar la prelecziun finala. A quella prelegian nouv auturas e trais autuors lur texts predilets scrits dal 2025. La prelecziun cumünaivla ha lö in dumengia, als 1. marz a las 15:00 in Chasa Misoch a Sent. Davopro daja apéro riche, inscunters e discuors.