18.11.2019
H27 via d’Engiadina. Sviament da La Punt km 18,00 - km 19,91
Project d’exposiziun nr. 27.5011 da l’october 2019
midada dal project (sortida La Punt)
1. Lieu e durada da l’exposiziun Las actas dal project ed il rapport davart la cumpatibilitad ecologica èn exponidas dals 18 da november 2019 fin ils 17 da december 2019 tar l’administraziun communala da La Punt Chamues-ch, Via Cumünela, 7522 La Punt Chamues-ch, per prender invista (art. 20 da la lescha chantunala davart las vias, LVias; DG 807.100). Durant il temp d’exposiziun pon ils documents er vegnir consultads e chargiads giu sut www.tiefbauamt.gr.ch > Rumantsch > Actualitads. La nova axa da la via (mellen) e las lingias da construcziun (blov) èn stajadas respectivamain marcadas en la cuntrada.
2. Midada dal project (sortida La Punt) Il project dal sviament da La Punt nr. 27.5011 da l’october 2018 è stà exponì publicamain en las vischnancas da La Punt Chamues-ch e da Madulain dals 19 da november fin ils 18 da december 2018. En connex cun il project d’exposiziun èn entradas differentas protestas e posiziuns. En sia protesta pretenda la vischnanca da La Punt Chamues-ch ina sortida a La Punt Chamues-ch nà da Bever. Questa midada dal project vegn exponida publicamain cun questa publicaziun. Tut las protestas e posiziuns ch’èn vegnidas inoltradas restan valaivlas vinavant.
3. Restricziun dal dretg da disponer A partir dal di che l’exposiziun è vegnida publitgada uffizialmain cun la midada dal project dovran ils projects da construcziun entaifer il territori ch’è cumpiglià dal project ina permissiun dal departament da construcziun, traffic e selvicultura dal Grischun. Quista permissiun vegn concedida, sch’il project da construcziun n’ha naginas consequenzas engrevgiantas per acquistar il terren u per realisar il project.
4. Protestas 4.1 Legitimaziun
Tgi ch’è pertutgà da la midada dal project e po far valair in interess degn da vegnir protegì per abolir u per midar quella, ha il dretg da far protesta. Il dretg da far protesta han plinavant las vischnancas pertutgadas e tgi ch’è autorisà tras il dretg federal da far quai.

4.2 Objecziuns
I pon vegnir fatgas valair:

a) objecziuns cunter la midada dal project d’exposiziun sco er cunter in’expropriaziun previsa e sia dimensiun;

b) dumondas d’indemnisaziun, en spezial pretensiuns per ils dretgs che vegnan fatgs valair e per autras pretensiuns che resultan dal dretg chantunal d’expropriaziun. La rectificaziun da questas dumondas ha lieu suenter l’approvaziun dal project en la procedura per l’acquist da terren.

4.3 Termin ed adressatProtestas cunter la midada dal project ston vegnir inoltradas entaifer il temp d’exposiziun cun ina curta motivaziun al departament da construcziun, traffic e selvicultura dal Grischun, Stadtgartenweg 11, 7000 Cuira.
Sche pretensiuns d’indemnisaziun vegnan fatgas valair posteriuramain, ston vegnir observadas las consequenzas da la negligientscha tenor l’art. 17 da l’ordinaziun chantunala d’expropriaziun (OExp; DG 803.110).
Cuira, ils 16 da november 2019
Departament da construcziun,
traffic e selvicultura dal Grischun

Il schef:
Dr. Mario Cavigelli, cusseglier guvernativ
PDF herunterladen