«Emil e’ls detectivs» es ün classiker da la litteratura per uffants. L’istorgia es eir ün grond divertimaint sül palc. I’l toc da teater «Luca e Gian e la banda da detectivs» daja bainschi parallelas cun l’original, ma eir adattaziuns ed interpretaziuns da l’istorgia. Emil nun es be sulet in quist toc teater, dimpersè quella rolla vain giovada dals duos frars Luca e Gian. Il viadi dal mat Emil aint il tren e l’invöl dals raps our da sia busacha resta. Eir Luca e Gian rivan a Berlin, ed eir els vegnan retschevüts da lur cusdrina chi ha nom Luna. La culissa principala es üna gronda cità. I dà però eir üna fabrica veglia ingio cha’ls uffants as inscuntran – lur zop. Ils dudesch uffants ill’età da terza fin ottavla classa giouvan cun grond ingaschamaint e plaschair e sun pronts per da las tuottas, sainza grondas retgnentschas.

«Il temp per quist proget es vairamaing massa cuort, uschè cha nussas redschissuras vezzain quist impustüt sco gronda schanza pels uffants dad avair üna jada contact cul muond da teater e ch’els pon üna jada as preschantar in ün’otra rolla. Nus sperain da svagliar il plaschair da far teater», disch Anna Mathis. Insembel cun Sidonia Janett es ella respunsabla pella redschia. Eir ils genituors sun partecipats cun da tuottas sorts incumbenzas, dal cuschinar spaghets al di da prouva fin al far bellet o la tecnica. Sustegn survegnan ils uffants eir da la Gruppa da teater Scuol. Gian Duri Crastan e Jachen Puorger han per exaimpel fat las culissas. (cdm/fmr)