Il cusglier guvernativ, Jon Domenic Parolini e la manadra da l’uffizi per la scoula populara ed il sport, Chantal Marti-Müller, accumpagnats dal manader da l’inspectorat districtual, Curdin Lansel, as han vuglü far ün purtret dal minchadi in üna scoula populara perifera rumantscha. Apaina rivats in Val suna gnüts retschevüts d’üna brajada uffants in scoulina a Valchava. Davo ulteriuras visitas ill’instrucziun in differentas classas primaras a Müstair e sül s-chalin sec I a Sta. Maria han las visitas surgnü üna survista sur da l’organisaziun da la scoula. La presidenta cumünala, Gabriella Binkert e’ls rappreschantants dal cussagl da scoula, Aldo Rodigari e David Spinnler, insembel culs mainascoulas Aita Stupan e Thomas Brülisauer han pudü tematisar diversas intenziuns in ün barat ourdvart constructiv. Cumüns e scoulas a la periferia han d’imprender a viver cun differentas sfidas. Co transfuormar difficultats in abiltats, quai es l’art da mincha minorità. Cullas visitas in scoula e cun l’inscunter cullas instanzas cumünalas ha il departamaint d’educaziun muossà interess per situaziuns da sfida, cha la scoula nu vain laschada suletta culs pissers e respet per la lavur prestada minchadi a favur dals uffants. (cdm/pl)