Raduond 120 persunas e ses generaziuns – confamigliars descendents da la lingia da schlatta dal paur e maister bacher Heinrich Andrea Duschletta (1876 – 1942) e sia duonna, la chasarina Anna Duschletta-Nogler (1883 – 1948) sco eir conjugals e partenarias – sun seguits a l’invid in chasa da scoula cun ün prüm inscunter dürant aperitiv, segui dal giantar cumünaivel cun discuors, baderladas ed eir sot e musica. 

Il nom Duschletta es verifichà i’l register da l’uffizi civil da Zernez fin l’on 1770. Datas plü veglias nun existan e sun probabelmaing arsas cul fö chi ha desdrütt dal 1872 la gronda part dal cumün. Stizzis d’utro muossan però via sün l’existenza d’ün Dreja D. Duschletta da Zernez dal 1638 opür da pussiblas fuormas dal nom da famiglia sco Janotus Tlorschetta da Bondo (1537) opür Urschletta da Serneus (1514). Ün Batrumieu Urschletta vain avant per exaimpel illa trilogia da romans istorics «Bergünerstein» dad Antonia Bertschinger sco servitur dal Chavalier Raduolf Planta (1569 –1638 ).

Las fotografias muossan la brajada dürant l’aperitiv davant chasa da scoula, alura il plü vegl Duschletta, Mario, cun 86 ons chi tegna in bratsch l’actualmaing plü giuven Duschlettin, Niculin, cun s-chars desch mais ed a Madlaina Duschletta chi ha pudü festagiar in dumengia seis quart anniversari.

Autur e fotografias: Jon Duschletta