Vi da las paraids seis plü nouvs purtrets, pro l’entrada üna tscherna da sias ouvras dals ons 1970 a Turich, sün maisa seis vin cotschen predilet ed eir la boccada sco ch’el as vess giavüschà. Otmar Derungs es stat omnipreschaint cun tuot seis amis a la vernissascha in venderdi passà a Ftan. Però Otmar Derungs nun es plü. El es mort la mità da mai a chasa a Strada. Seis fradgliuns han uossa organisà üna exposiziun a Ftan cun ün tschinquantina da purtrets vegls e plü nouvs. E la vernissascha es statta sco ün arrandschamaint da cumgià, simplamaing sco ün festina tanter amis in memoria da l’artist particular.

Tour cumgià ed regordar

Eir Marina Derungs, la sour, e seis duos frars Balser e Mario Derungs, sun stats commoss da la blera glieud chi han visità la vernissascha cun l’exposiziun speciala i’l Hotel Bellavista a Ftan. Els han nempe rumi la chasa da l’artist a Strada ed han vuglü preschantar l’ouvra da lur frar amo üna jada publicamaing. Ed eir bleras visitaduras e blers visitadurs han fat adöver da la pussibiltà da tour cumgià e da cumprar amo ün purtret in regordanza da l’artist o lura dafatta sco investiziun in ün’ouvra unica e limitada. Perche nouvs purtrets illa culur blaua cul bös-ch plain manzinas e ragischs e la bes-china filigrana nu daraja plü. L’exposiziun a Ftan düra amo fin als 19 october. «Forsa eir amo ün pa plü lönch», ha dit il frar Mario Derungs. Che chi capitarà però in avegnir culs purtrets chi nu vegnan vendüts in occasiun da l’exposiziun nu sa el da dir. «Nus nu vain quai amo scleri e perquai nu pudaina amo preschantar üna soluziun», hat dit Mario Derungs sün dumonda.

Via artistica sainza cumpromiss

Otmar Derungs vess accumpli in december seis 70avel anniversari. El es creschü sü a Ftan ed ha vivü dal 1971 fin 1981 a Turich. Dal 1981 es el tuornà in Engiadina ed el ha vivü fin pro sia mort a Strada. A Turich vaiva’l imprais autodidacticamaing a disegnar. Il plü jent disegnaiva’l bes-chas, plantas e muntognas in seis contuorn ed in seis agen stil. Dürant ils ons – cur cha tuot las bes-chas da sia stretta patria d’eiran disegnadas – ha’l cumanzà a disegnar eir bes-chas plü exoticas, adüna in möd fich filigran e precis. Eir perquai as chatta ill’exposiziun a Ftan eir purtrets nouvs cun zebras, tartarugas, o papagagls. Bleras da sias plü nouvas ouvras nu varan amo mai vis ün public e vegnan preschantadas a Ftan la prüm vouta. Fingià sias prümas ouvras dal ons 70 d’eiran caracteristicas pel stil dad Otmar Derungs ed el muossaiva fingià quella jada in che direcziun unica cha seis stil as svilupparà. Ed el nu s’ha laschà influenzar da ningün ed ha perseguità sia via sainza cumpromiss passa 50 ons. Otmar Derungs nun es plü. Però sias ouvras restan perdüttas da sia consequenza artistica per generaziuns futuras e tegnan l’artist d’Engiadina Bassa in buna memoria. E cun l’ultima exposiziun a Ftan as serra la rouda e l’artist es tuornà a chasa.

L’exposiziun da purtrets dad Otmar Derungs i’l Hotel Bellavista a Ftan düra amo fin als 19 october.

Text: Nicolo Bass