69 scolaras e scolars da settavla classa da Zernez fin Samignun han visità in venderdi passà 30 affars da 23 differentas branschas in Engiadina Bassa. Quist di da las portas avertas es gnü organisà per la seguonda jada da la Società da commerzi e mansteranza Engiadina Bassa in collavuraziun cullas scoulas da cumün. «Ils uffants pon uschè visitar ils affars e vezzan uschè ün ad ün co chi vain lavurà», quinta Jon Armon Strimer, president da la Società da commerzi e mansteranza Engiadina Bassa. Per el es quist di da las portas avertas meglder co da visitar ün’exposiziun. «Ils uffants pon cleger oura svess che mansters e che branschas da lavur chi vöglian visitar e nus provain d’accumplir quists giavüschs», quinta’l e declera cha mincha scolara e mincha scolar da la settavla classa das-cha vistar duos affars dürant quel di. Cha la coordinaziun e spartiziun dals uffants saja bainschi üna sfida, ma cha la collavuraziun cullas scoulas funcziuna fich bain. «Il manader da scoula da Scuol, Mario Rauch, s’ingascha fich ferm per quist’idea. Grazcha a quai pudaina insomma realisar il di da las portas avertas in Engiadina Bassa», disch Jon Armon Strimer. 

La plü gronda sfida es statta pel president da la Società da commerzi e mansteranza Engiadina Bassa dad organisar il transport dals uffants. «Eu sun fich cuntaint cha quai ha funcziunà uschè bain e minchün es rivà – per gronda part cul trafic public – al dret lö», declera’l. Cha las prümas reacziuns, tant da la magistraglia sco eir dals affars, saja positiva. «Nus fain uossa però amo üna retschercha pro’ls affars e giavüschain da trametter las reacziuns. Uschè pudaina profitar ed adattar tscherts puncts per l’on chi vain», disch Strimer. Per el esa evidaint, cha’l di da las portas avertas varà lö eir l’on chi vain. 

La Società da commerzi e mansteranza organisescha mincha tschinch ons l’EBexpo a Scuol. Dürant quista exposiziun regiunala han lö mincha jada eir exposiziuns da mansters per giuvenils. «Quista promoziun da la generaziun giuvna vain fatta mincha jada in ün’otra fuorma. «Ils dis da las portas avertas es uossa sco üna cuntinuaziun ed optimaziun da quist ingaschamaint», declera Jon Armon Strimer. La prosma exposiziun da commerzi e mansteranza EBexpo illa halla Gurlaina a Scuol ha lö dal 2028. 

Text: Nicolo Bass