Cul schi cler da la radunanza cumünala a la dumonda d'ün contrat d'aua per adöver da la producziun d'energi'electrica ha quella approvà üna dumonda da basa pel proget d'ün'ouvr'idraulica cun l'aua da la Val Sagliains in sen positiv. Uschè po l'Ouvra Electrica Susasca Susch SA (OESS SA) proseguir cun ün proget cumanzà dal 2012 e sisti quatter ons plü tard a causa da mancanza da sustegn finanzial. Il proget sta amo al cumanzamaint da la planisaziun. Implü, chi sun tanter oter eir amo da surpassar obstaculs da zonas da protecziun. Ils cuosts d'investiziuns da s-chars set milliuns francs dessan gnir portats da l'OESS SA sainz'ulteriur sustegn finanzial. Il cumün da Zernez es partecipà cun 90 pertschient a la società OESS SA.
Implü ha la radunanza approva unanimamaing la prolungaziun da duos contrats da concessiun a favur da la ditta Sosa gera SA per l'explotaziun da gera e sablun our da l'En e pel prelevamaint d'aua our da l'En cun scadenza fin la fin da l'on 2046. 
Eir unanimamaing es gnü approvada üna cunvegna da prestaziun culla regiun Engiadina Bassa/Val Müstair a reguard il ramassamaint d'immundizchas per l'import directiv da 78'000 francs 'on, respectivamaing per l'import cumplessiv da 546'000 francs sün la dürada da la cunvegna da set ons. 
E cun ün'abstenziun ha deliberà il suveran eir ün credit supplementar d'investiziun in l'otezza da 440'758 francs per lavuors in connex culla sanaziun dal provedimaint d'aua da baiver derivanta da la Val Sarsura. Tanter oter han stuvü gnir rimplazzadas ot vascas da serra lung la lingia da transport a causa dal squitsch augmentà illa linga. 
Autur e fotografia (archiv): Jon Duschletta